“Pu Lalduhoma kaihhruaiin Central-ah engmah sawi chhuah an nei thei lo” – Mizoram BJP President
Mizoram BJP President Pu Vanlalhmuaka’n Mizoram sawrkar Pu Lalduhoma kaihhruaiin Central sawrkar an dawr hlawhtling lo hle tih mipuite’n an hria, a ti.
He thu hi nimina Aizawl Press Club-a Press Conference-ah sawiin Pu Vanlalhmuaka chuan Chief Minister Pu Lalduhoma leh a thawhpuiten sawrkar laipui an dawrin an hlawhtling lo hle a, khumbeu leh Mizo puan chi hrang hrang pea thla an lakpui chu an thlen san ber a ni, a ti.
BJP President chuan state inthlanah BJP chu ar chuk tui lo khawpin sawichhiat a ni a, BJP inhlauh siaknain vote zawn thin a ni tih sawiin Mizo mipuite chuan hmasawn an duh chuan an fin thiam a tul, a ti.
Pu Vanlalhmuaka chuan sawrkar laipuia BJP hotute nen an inhmuhin Lok Sabha member-ah thlan tlin a nih chuan Mizoram hmasawnna tur lian tam tak sawrkar laipuiin an tihsak dawn, a ti a. Hmarchhak state-ah State President MP inthlana ding awmchhun a ni tih sawiin thlan tlin a nih chuan Central Minister a ni thei dawn, a ti. Lok Sabha MP pakhatin Central sawrkar do a hlawk loh zia hrechiangtu chu MNF President Pu Zoramthanga leh a thawhpuite an nih thu a sawi, a ti a. BJP leh Hindu sawizawm chu party dangho au hla ber a ni tiin, Kristian Minister a awm theih nan amah vote tling turin mipuite a ngen a ni.
Pu Vanlalhmuaka chuan thlan tlin a nih chuan PM Scheme hrang hrang mipuiten tangkai zawka an hman theih nan hma a la dawn, a ti a. Mizoram BJP chuan hmasawnna chu an ngaih pawimawh ber a ni tih sawiin Mizoram hmasawnna chu sawrkar laipuia hotuten an tiam, a ti bawk. Pu Lalduhoma kaihhruaiin Central-ah engmah sawi chhuah an nei thei lo, a ti a; a zin hawa Press Conference-ah pawh hmasawnna tur an sawi chu hun hmasa lama hmalakna hlawhtlinna chauh a ni tih sawiin an zinna hlawhchham lanna chu ZMC-ah a chiang tih a sawi bawk. (AIR)
