Pu Lalfakmawia thihnaa inhnamhnawihte man kima an inhriat thu Police-te’n an sawi
24 Feb 2025: Vawiin khan Pu Pukhraj Kamal, IPS, SP Mamit chuan Pu Lalfakmawia, kum 59, Bungthuam Dt. 12.02.2025 zana bo a tuk Ni 13.02.2025 a ruang chhar thihna chungchangah thutharthehdarhtute a kawm.
Mamit SP-in a tarlan danin Pu Lalfakmawia, Bungthuam khua bo thu hi Ni 13.02.2025-a Kanhmun Police Station-a information an dawn bawhzuiin he tualthihna hi mi dang kut tuar ngei a a ruang hmuh a nih avangin Police te’n uluk taka hnuchhui a nih hnuah mi pasarihte rinhlelh thil thuah man an ni tawh thu a sawi a. Police-te’n hnu an chhuina kawngah Bungthuam khawtlang hruaitute leh thutharthehdarhtute tawiawm leh thawhpuina kawngah lawmthu a sawi a, he tualthihna hi Kanhmun Police Station-ah PS Case No.3/2025, u/s 103 (1), 311 BNS hmanga thubuai ziah luh a ni.
Pu Lalfakmawia hi a nupui Sondorung Reang, kum 27 in a sawi danin Ni 12.02.2025 zanah in atanga chhuakin a bike Royal Enfield leh pawisa fai Rs. 1,70,000/- vel keng a chhuak chu a tuk thleng ala haw loh thu khawtlang hruaitute hnenah report-in, a ruang hi Bungthuam leh Luimawi inkar Kobawi luiah tshirt leh under chauh ha-in, a nghawnga Gamcha-a insuihin hmuh a ni ta a,a lu tukhum lamah hian tuboh hmanga chhutna hmun 5 ah a awm bawk a ni. Pu Lalfakmawia bike leh thawmhnaw hi a ruang hmuhna atanga km 7 vel Thinghlun road-ah hmuh zui niin, he thihna hnuchhuina atana tangkai tur thildangte pawh chhuizui zel a ni bawk.
He tualthihna chungchangah hian a nupui Sondorung leh a thian hnai tak Ramnunmawia remruatna hnuaiah midang rawih belha chet lak a nih thu Police te’n an hnuchhuina atanga a lan dan a nih thu an tarlang a, inhnamhnawih dangte an awm em tih chu chhui zui mek zel a nih thu an tarlang bawk.
Pu Lalfakmawia, Kum 59 Bungthuam khua thihna avanga Police te’n an man te hi 1) Sondorung Reang (27) Bungthuam 2) Ramnunmawia (39) Bungthuam 3) Ajit Kumar Reang (35) Assam 4) Bimal Reang (60) Bungthuam te chu rinhlelh an nih avangin man a ni a, Nimin 23.02.2025 zing dar 4 velah 1) Banik Reang (35) Assam 2) Kochomoni Reang (26) Assam leh 3) Khirud Reang (28) Assam te man niin tualthahna atana inhnamhnawihte chu man kima an inhriat thu an tarlang a, Pu Lalfakmawia ruang luia paihna atana an hman Auto Rickshaw chu chhui zui mek a nih thu an sawi bawk. Mihring mante hi thu zawh fiah tur zawhfel an nih hnuah jail-a dah luh an ni ang.
