21 April 2024: Mizoram Public Service Commission (MPSC) hna lak dana thil felhlel awm ni-a puh chhuichiang tura ruat Pu M.Lalmanzuala (IAS rtd) chuan naktuk (Thawhtanni) emaw naktip (Thawhlehni) emaw hian a report a peih hman a rin thu a sawi.
Pu Manzuala chuan an hna hi sawrkar pisa kai nî, ni 2 chiah an la khawih hman niin a sawi a. A thil chhuinaah hian Sawrkar chuan amah pui turin Deputy Secretary pahnih an pek thu leh MINECO Aizawl-a Secretariat-ah pisa tur an ruahman sak thu a sawi a. MPSC-a thawkte chawlhtir rih an nih laiin an document duh angte pe thei turin thawktu thenkhat chu pisa an kai phalsak a ni, tiin; report hi thehluh theih thuai a inbeisei thu a sawi a ni.
Tarlan tawh angin MPSC-in Combined Civil Service leh sawrkar hna dang a lak danah thil fel lo a awm ni-a puhin MZP chuan MPSC Chairman Pu JC.Ramthanga chu bâng turin an phût a. A bàn loh avangin Thawhtanni liamta atang khan MPSC hnathawkte pisa kal tur an dang a ni.
Thawhlehni liamta khan Mizoram Sawrkar-a Vigilance Dept Secretary chuan MPSC hna lakna a thil fel lo awm ni-a sawi hi chhuichiang turin Chief Secretary hlui Pu Lalmanzuala hi a ruat a. Ni 7 chhunga an thil hmuh dan report thehlut turin tih a ni. Pu Manzuala hi MPSC Member-ah kum 4 a awm tawh a, kum 6 chhung Chairman hna a lo chelh tawh bawk. (AIR)
