Rajya Sabha MP Pu K.Vanlalvena’n Indo-Myanmar ramri hung tum chu Mizoram mipuite duhdan a ni lo tih Home Minister hnenah ziakin a thlen
09 Feb 2024: Parliament session kal lai mekah vawiin khan Rajya Sabha MP Pu K.Vanlalvena chuan India sawrkarin Indo-Myanmar ramri hung kalpui a tum chu Mizoram mipuite duhdan a ni lo va, he thutlukna hian Zoram mipuite a thawng hle a ni tih Home Minister Pu Amit Shah hnenah ziakin a thlen.
British sawrkarin dik lo taka kan ramri min siamsak avangin Zofate chu India, Burma leh East Pakistanah te tihluihnaa thendarh kan nih thu leh he ramri diklo tak hi India independence tirh atanga tun thlenga siamthat la ni lo hi hnam anga inrahbehna anih thu Pu K.Vanlalvena chuan Pu Amit Shah hnenah hian a thlen a. India independence hnu kum 75 chhung zalen taka kan lo inkalpawh thinna Free Movement Regime, tih tawp tumna pawh hian ramri bul hnaia chengte ve ve tan harsatna nasa tak a siam tur thu a thlen bawk a ni.
Indo – Myanmar ramri hung hian ramri kal tlanga dan lova sumdawnna hrang hrang drugs leh ralthuam tawlh ruk thin te hi a tihtawp beiseina avang anih chuan fencing hian chung sumdawnnate chu a tawp phah dawn lo tih Bangladesh ramri kaltlanga ralthuam tawlhruk vawi tam tak Ramri vengtuten an man thin dan atang hian a lang fiah tih Pu Vena chuan a sawi bawk. Myanmar nena kan inrina hi hung anih chuan kan sangha manna tha tak KM 500 laia sei ramria luang mek kan luite chu ramri pawnah dah anih dawn avangin kan hloh dawn tihna a nih thu a thlen bawk.
Hengte avang hian Indo-Myanmar ramri hung tumna hi Mizoramah tih loh ni se tih Pu Amit Shaha hnenah hian Mizoram MP chuan ngenna a thlen a ni.
