Rampawn a hnathawk tura kalte’n buaina an tawh thu-ah Agency 29-te man an nih tawh thu Home Commissioner-in a sawi
30 April 2024: Mizo nula thenkhat rampawn a hnathawk tura kalte’n buaina an tawh chungchangah sorkar chuan nikum atanga hma an lak tawh thu leh ramdanga hnathawk tur tirchhuak thin Private Placement Agency 29-te man an nih tawh thu Home Commissioner Pu H.Lalengmawia chuan a sawi.
Pu H.Lalengmawia chuan ram danga hnathawka chhuak turte chu anmahni tirchhuaktu Agency-te leh an hnathawh dan tur zirchiang hmasa turin a chah a ni.
Home Department hotute hnen atanga thudawn danin, ramdanga Mizo thalai hnathawka kalte harsatna tawh chungchang chu nikum August thla atang khan chak taka bawhzui a ni a, thuzawh fiah tur tepawh Police Station-ah koh niin an statement te pawh record anih bakah man turte pawh man an ni a, hetihlai hian bail theih an nih avangin bail-in an chhuah bakah nikuma thubuai lut chu chhui zawh anih tawh thu leh dan anga hmalak zel anih tur thu an sawi bawk a ni.
Thudawn bawhzuina atanga a lan danin, tunhnaia Private Placement Agency thenkhatte chuan aadhaar card lem siam avang te, kum 18 hnuailam tirhchhuah vangte leh ram pawna hnathawk tura thawnchhuak tura valid certificate an neih loh avanga man te an ni tih Home Department hotute hian an sawi bawk a. Home Deptt hotute chuan Private Placement agency-te chu dan pangngai angin, Emigration Act hnuaiah license nei tura hma la turin thurawn pawh an pek tawh thu sawiin, dan anga an tih theih chuan Mizoram tan pawh hmasawnna tur nia an ngaih thu an sawi tel bawk. (DD)
