21 Dec 2023: Home Minister Pu K. Sapdanga’n ramri chungchanga sorkar dinna chu a la ngai reng a, BEFR 1875 a ni, a ti.
Vawiin khan Home Minister hian ramri depa khaw hrang hrang – Saiphai, Saihapui V, Buarchep, Vairengte Auto Stand, Aitlang, Phaisen, leh Zophaia duty sipaite tlawhin he thu hi a sawi a. Ramri chungchang buaipui tur Boundary Committee din thuai sorkarin a tum ang a, anni rawtna leh thurawn ang zelin ramri chungchangah chuan sawrkarin ngaihtuahna a seng dawn a ni, a ti
Home Minister chuan, Mizoram leh hnam himna atana nunna thapa duty sipaite sorkarin a chhuang em em a, hmun khawharthlak takah ram leh hnam him nan indaih lo tak chungin an khawsa tih sorkarin a hre reng a ni, tiin rinawm taka an duty avangin lawmthu a hrilh.
Home Minister hian ramri duty sipaite Krismas chibai bukin, Krismas hlim taka an hman theih nan Home Dept. hmingin Krismas thilpek sumfai a hlan a. Chief Minister-in ni 100 chhunga an tih tur a sawite a hlawhtlin ngei theihna turin chak takin hma an la zel tih sawiin ramria duty-te pawh theihtawp chhuah turin a ngen a ni.
Pu K. Sapdanga hian Kolasib Circuit House-ah Kolasib District a sawrkar hotu hrang hrangte bakah, NGO-te a kawm bawk a. Sawrkar thar au hla ber chu kalphung thar mipui sawrkar tih anih thu sawiin, a enkawl Home Department chuan a daido lam atanga hna tan turin ruahmanna an siam, a ti a. Ruihhlo-in nasa taka Mizoram leh hnam a run mek a, a rawn luhna Champhai lam a han fang hmasa a, police force hmang chauh chuan heng thilte hi do hneh a ni dawn lo tih a takin an han hmu a, mipuite nen thawhhona tha tak nen ruihhlo hi ralpui phiara do tlan a ngai dawn a ni, a ti. YMA leh pawl hrang hrangte pawh sawrkar nen nasa leh zuala thawhho puiah an sawrkar chuan a sawm a, chanchin thar theh darhtute pawh mipui rilru puthmang a tha zawnga kaihruai tur leh sawrkar hmalakna tawiawm zel turin a sawm a ni.
Home Minister hian Kolasib Press Club pawh tlawhin, MJA chu a khawvel a lo ni rei tawh a, Kolasib-a a thiante hmel a hmu leh lawmpuina hlu tak an lo hlan chu thinlung taka a lawm thu a sawi a ni. (AIR Aizawl)
