Rel a service theih hunah Mizo thalaite tana hna engemaw zat a awm theih CM-in a beisei
17 Oct 2024: Vawiin khan Chief Minister Pu Lalduhoma chuan a office-ah Pu Arun Kumar Chaudhary, General Manager of Construction, North East Frontier Railways (NFR) a kawm a, Bairabi leh Sairang inkara rel kawng hnathawh mek a sawipui.
Chief Minister chuan, rail station approach road te chu a rang lama sial tura state sawrkarin hma a lak tur thu a lo hrilh a. Hmabak an neih hrang hrangte a lo zawt bawk. Rel a service theih hunah Mizo thalaite tana hna engemaw zat a awm theih a beisei thute pawh a lo hrilh a ni.
General Manager hian, nakum July ni 31 hmain kan hnate hi zawh hman kan tum a, engemaw harsatna danglam bik a thleng a nih loh chuan kan zo hman ngeiin kan ring a, leihlawn sang tak tak a awm nual a, chuta tanga han hawi vel hian a mawi em em vek a, he rel kawng hian transportation lama awlsamna bakah khualzin pawh a hip nasain kan ring ni, a ti. An hmalaknate hmuhpui turin Chief Minister hi a sawm nghal bawk.
