Remna Ni pualin inkhawm

30 June 2026: Vawiin chawhma dar 11:00 khan MZP Hqrs Office Lungleiah Remna Ni pualin inkhawm a ni.

Inkhawm hi H.Lalhmingmawia President MZP Hqrs Lunglei chuan a kaihruaia MZP aiawha thusawitu Benjamin Vanlalfela, Adviser chuan Mizote hi midangte awpbehna hnuaia awm duh ngailo hnam kan ni thin a, Sap hovin min awpbehna hnuai atanga kan chhuah dawn pawh khan hnamdang hnuaia awm duhlo kan ni a ti. Chutiang anih avang chuan kum 1966 a Zalenna sual a lo nih khan midang hnuaia kun duhlohna thinlung chu nasa taka chawh thawhin a awm a ni a ti. Hetiang karah hian Zalenna sualtu hnam sipaite leh Mizo mipuiten kan rin phak bakin hrehawm nasa tak erawh kan tuar leh si a, sipai rawva tak tak hnuaiah kan hmeichhia te an him lohna hnuaiah Mizo mipuite chu nasa takin kan rum a.

Hun a lokal zela kum 20 hnuah remna thuthlung ziah a lo ni ta chu rambuai hrehawm zia hretute tan chuan a lawmawm mai ni lovin a hlut zia sawi sen a ni lo tiin, Remna leh Muanna a awm theihna tura Kohhran leh Political Party hrang hrang, Pawl hrang hrangte hmalakna a fakawmin an ngaihsan awm a, thangtharte hian remna leh muanna a awm theih nana thawktute hi kan hriat reng a tul hle a ni, MZP Hqrs Lunglei Adviser chuan a ti.

Remna Ni a lo thlen hian Remna a awm theih nana thawk ber ang leh insawi ropui nana hmang thinten sim sela, siamthat theih tawh loh hun kal tawha thil thlengte inchirh theh nan leh indem nana hman hi MZP chuan a duhlo tak zet zet a ni, a ti bawk.

MZP Office Lungleia Remna Ni puala inkhawmah hian Political party hrang hrang aiawhte’n thu sawiin, Remna hlut zia leh rambuai awmzia leh Mizo khawtlang nuna nghawng a neih dan te, remna a awm theih nana kil hrang hrang atanga hmalakna awm dan te leh a bik takin Political party-te remna a awm theih nana an tha thawh dan leh an inpekna te tarlangin, Remna Ni chu tute Party ta bik mah anih loh dan leh Mizo mipuite ta anih thu an sawi hlawm a ni.

Vawiina hun hmannaah hian MZP Hqrs Lunglei Secretary K.Lalchhuanawma chuan inhmelhriattirna hun hmangin an hmalakna thenkhat a tarlang a. Tun hnaiah zirlai titha Class X leh XII atangin Distinction a pass mi 115 leh Top ten a lang mi 2 chawi chawimawi thu te, Union Education Minister hnenah Competitive exam hrang hrang bei duhte tan Centre mumal Lungleiah dah tura an dil mek thu te, LMC nen tangkawpa Zirlaite Run siam tum mek anih dan te, ATL kawng hnathawh mek umzui zel an tum thu leh, Lunglei Town Zirna lama hmasawn theih nan an mamawh leh harsatna hre turin zirna In hrang hrang tlawh chhuah an tum bakah, MPSC Exam bei duhte an awm chuan mi pahnih emaw sum leh thil tul dangah hmalakpui an tum thu te a tarlang a ni.