Ruihhlo dona kawnga dan hriat ngaite zirho a ni

26 June 2026: Excise & Narcotics Department, Lunglei buatsaihin vawiin chawhma dar 10:30 khan Excise & Narcotics Department Conference Hall Lungleiah ‘Dissemination Of Awareness Material On Legal Limitation of Civil Society’s Participation in Anti Drugs Activities’ hun hman a ni.

Inkhawm hi Pu Zohmingliana Officer incharge END, Lunglei chuan kaihruaiin kalkhawmte lawmna leh ruihhlo dona kawnga YMA-te dan hnuaia hmalak dan zirhona chu tul an tih vanga hetiang hun hi buatsaih an nih thu a sawi.

YMA Sub Hqrs President Pu K.Lalfakzuala chuan thu sawiin, YMA hruaitu chu ruihhlo do tur hian a ban a hlim nghal a, ruihhlo laka kan thalaite, kan chhungkuate, kan hnamte chhanhim tur hian YMA hruaitute hian kan thinlungah kan intiam mawlh mawlh a, chulai karah chuan beidawn rum rum chang pawh kan nei thin a, chuvangin, dan hmangin engtinnge ruihhlo kan nawr tawm ang tiin kan infuih phur a tul hle a ni, a ti.

Ruihhlo dona kawngah hian dan erawh hriat angai hle Pu Faka chuan tiin, ruihhlo zuartute’n Ukil-te an ruaia reilotea an chhuak leh mai zelte hian min tichau thin mahse; dan hnuaiah huaisen taka dolet turin YMA chu a kal zel dawn, a ti. Vawiina kan ramin chhung lam hmelma a neih len ber chu ruihhlo a ni a, Kohhran thalai Pathian Biakina kal thin tam tak nun a ti chhe zel, hetiang taka kan chhunglam hmelma bei tur hian YMA-te hi kan beidawng thiam lova, engtinnge dan hnuaiah huaisen taka kan do zel ang tih ngaihtuahin, vawiin kan hun hman hi raldo tura intuaihriamna hunah i ngai ang u, a ti.

Vawiina hun hmannaah hian Pu H.C. Lalramthara Inspector END leh Pu R.Khawpuimawia, Asst.Commissiiner END, Lungleite chuan ND& PS Act leh MLP Act chungchang sawifiahin, heng dan hnuaia ruihhlo dona kawngah hriat tur hrang hrang- mi lirthei leh In check theih dan te, danin YMA emaw Civil mite tan tute emaw check ve ngawt a phalloh dan leh dan in a phal chin bakah ruihhlo leh a neitu man chu Court lamah hrem an nih loh fo dan te, mimal dap dawn a fimkhur a ngaih thu leh a bik takin hmeichhia dap tura fimkhur a tul thu te, kutthlak chu dan phalloh a nih avangin fimkhur a tul dan te bakah ruihhlo donna kawnga dan hriat tur hrang hrang zirtirna an pe a, zawhna leh chhanna hun hman a ni bawk.

Vawiin ruihhlo dona kawnga dan hriat ngaite zirhonaah hian Lunglei khawpui chhung YMA Branch 21 atangin aiawh pahnih theuh leh YMA Sub Hqrs hruaitute telin MHIP Sub Hqrs hruaitu thenkhat leh MJA aiawhte an tel bawk.