Ruihhlo Dona Kawngzawh

02 Oct 2026: Mizoram hmun dangte ang bawkin vawiin chawhma dar 11:00 khan Lungleiah YMA Sub Hqrs bultumin ruihhlo dona kawngzawh buatsaih niin, thupui atan “Ruihhlo tel lo hringnung” tih hman a ni.

Lungleia ruihhlo dona kawngzawh hi chhim lam leh hmar lam atanga zawhin Mizofed Kawt Venglaiah intawk khawmin hun hman a ni. Mizofed kawta hun hman hi Zothanzuala Hnamte, Vice President YMA Sub Hqrs-in a kaihruaia, Rev. C.Vanlalmuankima AGS, BCM Hqrs-in hunserh a hmang.

He hunah hian Pu K.Lalfakzuala President, YMA Sub Hqrs chuan thu sawiin, vawiinah hian kawng kan zawh ho mai ni lovin kan tu leh fate, kan chhungkua leh kan khawtlang, kan Ram leh Hnam hi ruihhlo-in a tihchhiat kan phal lo tih lantir tur leh Ruihhlo tel lo hringnun hi – Kan Ram leh Hnam damna atan a tûl a ni, tih lantir turin kan pungkhawm a ni, a ti.

Pu K.Lalfakzuala chuan, END chhinchhiah danin kum 1984-2025 chhung khan zû leh ruihhlo avangin Mipa 2073 leh Hmeichhia 297; an vaiin mi 2370 zet an thi a. (BCM Beirual bu 2026) Kumin 2026 January atanga May thla chhung khan mi 21 lai an thi leh hman tawh bawk a. (Zalen news May 21, 2026) Ruihhlo avanga thi hi mi 2391 an ni a, 2400 dawn an tling, tihna a nih chu! a ti.

Zirlai leh thalai duhawm takte u, vawikhat chauh ruihhlo an tih chhin avang a kîr leh thei tawh lo tam tak an awm a, Ruihhlo hi vawikhat pawh lo ti chhin suh u, a ti bawk.

Ruihhlo avanga hliam tuarte chhanchhuak turin, Samari miṭha rilru pu chungin kan Mizo hnam zia kha i kaitho thar leh ang u, tiin pungkhawm mipuite a sawm a ni.

Pu K.Lalfakzuala chuan Ruihhlo zuartute hnenah, Ruihhlo in zawrh avang hian in khawsak a nuamin, in hausa-in, in lian tual tual a ni thei e. In thiltih hi, mahni mihringpui te, chhungkua leh khawtlang chhiat phah vek theihna a nih avangin, kan hnam hian/kan khawtlang hian in thiltih hi kan ngaidam thei lo a ni. Vawiina helaia lo kal khawm mipuite hian kan ram leh hnam hmingin in eizawnna hi lo sim turin kan ngen che u a ni, a ti bawk.

Pi Lalliannguri, President, MHIP Sub Hqrs Lunglei pawhin, ruihhlo-in chhungkua a tih chhiat nasat dan leh supply reduction leh demand reduction-ah tan lak a tul thu a sawi. Vawiina Lungleia ruihhlo dona kawngzawhah hian tlawmngai pawl hrang hrang atang leh Kohhran lam atangin mi thahnem tham tak an tel a, ruihhlo duhlohna thuziak chi hrang hrang an ken bakah ruihhlo leh a zuartute demna thu-in an au rual bawk.