19 May 2025: Social Welfare Minister Pi Lalrinpuii’n Mizorama ruihhlo ngai enkawlna hrang hrang chu Sawrkar hriatpuina Accreditation tih vek a ngai tawh dawn tih a sawi.
Vawiina a pisaa chanchinbumite a kawmnaah he thu hi sawiin Minister chuan sorkarin dan a neih The Mizoram Drug (Controlled Substance) Act, 2016 leh The Mizoram Drug Treatment cum Rehabilitation Center Accreditation Rules, 2019 hnuaiah Drugs De-Addiction Center/Rehabilitation Center te chuan Sorkarah Accreditation an tih vek a ngai tawh dawn a ti a, dan hnuaiah chuan infrastructure, human resource, service, documentation leh adangteah zawm tur siam niin hetiang zawm lo chu Center din emaw kalpui phal a ni tawh dawn lo a ti. Accreditation chu Centre-te tihtawp tumna ngawr ngawr a ni lo tih sawiin Centre ten rualkhai zawk leh ruihhlo ngaiten enkawlna an mamawh ang tak an dawn theihna tura awmze nei taka enkawlna kalpuina tur a ni a ti.
Minister sawi danin sorkar chuan Centre din a, an theih leh phak ang tawka enkawlna lo kalpuite inpekna pawh a hriatpui tel a ti a. Center ding sa chu awmze nei taka enkawlna an kalpui chhunzawm theih nan kawng hrang hrangin puihna pek a inhuam tih a sawi a. Sumfaia tanpuina bakah service pawimawh bik pek te pawh a tel dawn tih a sawi a ni. (AIR Aizawl)
