Ruihhlo zuar awm lohna; YMA Branch Hmuntlang-in an Golden Jubilee an lawm

05 May 2026:- Vawiinah YMA Hmuntlang Branch chuan an din champhaphak vawi 50-na Golden Jubilee chu Community Hall, Hmuntlangah an hmang a, Pu C. Biaknghinglova President, YMA Hmuntlang Branch chuan Jubilee lawmna inkhawm a kaihruai a ni.

Khuallian Pu C.Lalrindika, Secretary, YMA Sub-Hqrs Lunglei chuan, Kum 1976 May ni 5 a din YMA Hmuntlang Branch din fel alo ni tawh a chhim lama YMA Branch dinna hmasa pawl a ni hi khaw upa leh khaw hawiher zau a nihna a lang tih sawiin Hmuntlang hian khaw lian nihna hauh tawh lo mahse a hrin te avangin a lian reng tawh ang a ti.

YMA hian chona lian leh mawhphurhna lian zawk a hmachhawn thar zel a, chung karah chuan hruaitu tha leh member tha a mamawh deuh deuh dawn a ni, YMA rawng hi politics avanga a dal a thiang lo va, YMA hi lei theih emaw a meichher chhit timit tura tu chhem kual theih mah a ni lo tih sawiin, mi thenkhat thil hrechiang leh zirchiang miah lovin an duh dan anga YMA an lo sel thin chu an hriat chian tawk loh vang a ni a ti.

Ram leh Hnam Humhalhna turah Hnamdang Nupui/Pasal a thlang lo turin thalaite sawmin, mahni hnampui ngei kawppuia thlanga hnamdang mipa aia Mizo mipa te tha lo zawka ngai palh thin Mizo Nula ten mahni hnam pui Mizo tlangvalte thlang zel turin a chah bawk.

Mizo thalaite chu hun awl hmang tha tur leh social media hmanga hun tha tul lova khawhral lo tura sawmin; kan thiam leh theihna te hmanga tum bulfuk nei fel a, hmalam atana inbuatsaih turin a sawm thar bawk a ni.

Dam leh tlang khatah, thih leh ruam khatah ti hnam Mizo te hian kan ram leh hnam hmelma Ruihho hi mimal, chhungkua, kohhran, khawtlang leh sawrkarte’n lungrual taka kan do a ngai takzet tawh a ni, a ti bawk.

YMA Hmuntlang Branch te hian Sawrkar puihna tel miah lovin Golden Jubilee hi an lawm a. Rev. C. Darkhum a Branch Secretary hmasa berin Jubilee lung phun hawngin tlai lamah Jubilee ruai khawtlang huapin an theh bawk a ni.

Pu Lalhmingsanga Chhangte, Secretary chuan report pe in Hmuntlang chu Ruihhlo Zuar awm lohna ‘Dry Village’ anih thu leh YMA-in ruihhlo awm lohna khuaah siam chhunzawm zel a tum tih a sawi bawk.

Tun dinhmunah YMA Hmuntlang Branch-ah member 60 bawr vel awmin:
Pre – Pu C.Biaknghinglova
Vice Pre – Pu R.Lalengzuava
Secy – Pu Lalhmunsanga Chhangte
Trea – NL. PL. Zodangpuii
Fin. Secy – Pu C. Lalrinawma te ani

Hmuntlang Golden Jubilee-ah hian Pu C. Lalrindika, Secretary, SYMA bakah Pu P. Thanngura-SEC, Nl. Vanrammawii Pautu, leh Pu C. Lalmuanpuia SYMA aiawh bakah Pu R.Zothantluanga President, Pu PC. Chuaugura, Vice President, Pu R. Liansangpuia Vice President, YMA Haulawng Branch-ten an hmanpui a ni.