31 Jan 2025: Vawiin khan Lunglei District Superintendent of Police Pu J.Lalmuankima kaihhruaiin SP office chamber-ah Lunglei khawpui chhunga hnu chhuitu investigating officer-te nen kum hmasa lam leh kum kal meka pawi khawihna thlen dan thlirhona, crime review meeting buatsaih a ni.
He hunah hian kum 2024 chhunga thubuai ziah luh (case register) ennawn anih bakah, kum 2025 chhunga thubuai ziah luh tawhte thlirho a ni bawk a. Thubuai chhuizuina kawnga hriat tur leh zawm tur thu pawimawhte sawiho a ni bawk.
Kum 2024 chhung khan kum hmasa lam nena khaikhinin rukruk leh inrawkna thubuai chu nasa takin a tla hniam a. Hemi chungchangah hian Lunglei SP chuan VDP leh tlawmngai pawlte nena police-te thawhhona that vang anih thu sawiin, lawmthu a sawi a. Mahni in leh a vela CCTV vuahte’n hnu chhuina kawngah police-te nasa taka a puih thu sawiin, lawmawm a tih thu leh mahni in leh a vela CCTV vuah chu intihhmuh zel tha a tih thu a sawi.
Hetih rual hian kum 2023 aiin kum 2024 chhungin lirthei chetsualna (motor accident) kaihhnawihah thihna a thlen tam thu tarlan a ni a. Lunglei SP chuan kawngpui te a that tawlh tawlh rualin mipuite leh lirthei khalhtute fimkhur deuh deuh a ngaih thu sawiin, zirna in leh kohhran bakah, mipuiteah a tam thei ang ber inzirtirna buatsaih tum a nih thu a sawi a. Hemi inzirtirna atan hian Lunglei Police te chuan lemchan tawi (short film) an buatsaih mek thu a tarlang bawk.
Lunglei SP chuan police-te chu mipuite tana thawk an nih angin mipuite tana dawr nuam leh biak nuam ni turin a fuih a. Mobile phone bo chungchangah pawh uluk taka chhui zui zel anih tur thu sawiin, a lo leitute thleng pawha thu buai siamsak zel anih tawh tur thu a sawi bawk.
