13 Oct 2025: Sairang a rel a luh hnuah Mizoramah khualzin an pung nasa hle a, sum vei vak a pun phah niin hemi chungchang hrechiangtuten an sawi.
Vawiin hi Sairanga rel a lo luh atanga thla 1-na chiah a ni a, Akashvani Aizawl zawhna chhangin Hotel Jay Jay, Falkland Veng, Aizawl neitu Pu Jarvis Lalramnghaka Chhakchhuak chuan September ni 13-a Sairang rel a service ṭan atang khan an Hotel a mikhual thleng zat chu a letin an pung tih sawiin, an room neih zatah pawh an leng lo fo a ti a, state pawn atanga khualzinte chuan Mizoram nuam an ti hle tih sawiin, rel rawn lut chu Hotel neitute chauh ni lovin mi tam takin an ṭangkaipui a ti. Mizorama tlawh tur hmun hrang hrangah te tlawhtu an tam phah a, taxi leh lirthei hmanga eizawngten an tangkaipui a, khualzinten Mizo thil an ei chak avang leh Mizoram thil hawn an duh thin avangin thingpui dawr leh Bazar-a sumdawngte pawhin an hlawkpui hlea a rin thu sawiin, tunhmaa khawlaia sum vei vak tlem thin chu rel service hnuah a pung hluai nia a hriat thu a sawi a ni.
Sairang Rel Station ILP counter atanga Akashvani thu dawn danin, September ni 13 atanga vawiin October ni 13 thlengin Sairang rel stationah ILP 5154 pek chhuah a ni tawh a, Guwahati – Sairang Express a chuangte zingah ILP pekchhuah a tam ber a ni. (AIR)
