5th December 2024: Vawiin khan Chief Minister Pu Lalduhoma, Finance Minister ni bawk chuan Aijal Club Conference Hall-ah Mizoram Finance & Account Service Association te 29th Annual General Conference 2024 a hmanpui a. Thu a sawinaah “Kalphung thar sawrkarah officer te eirukna lakah an fihlim ngei tur a ni” a ti.
Chief Minister chuan, Local audit kan tichak a, kalphung tha zawk a awm theih nan special audit te kan kalpui a, central sawrkarin local body grant te pe chhuak (release) tura online audit a phut avangin hun rei tak grant hi kan lo dawng tawh lo va. Hei hi kan bawhzui vat a, Delhi ah te ka zu sawi bawk a. A hnu lawkah Rs. 35 crore min rawn release sak ta a. Kumin chhung ringawt hian VC leh LC tana 15th Finance Commission Grant hi vawi thum ngawt, a vaiin Rs. 105 crore kan hmu tawh a. Kum 2022 hnua kan hmuh lehna hmasa ber a ni, a ti.
Pu Lalduhoma chuan, Budget proposal siam hun kan lo thleng leh der tawh a, budget dik (realistic) tak kawng hi department tinten i zawh ang u. Budget lang mawi tak, kan nihna ni lo deuh si an hmuh khan kan lan that hmel a. Revenue Deficut Grant kan hmuh hniam phah thei. Political Advantage atana lan that ai chuan kan nihna dik tak kan lantir khan ram tan a hnemhnanpuiawm zawk a ni, a ti.
Chief Minister chuan a tlem thei ang ber sum puk ni se kan ti a, state matching share nei sang chi scheme pawh hi a theih hram chuan i pumpelh ang u. Overdraft lo va kal hram kan tum a, K-deposit pawh tihtlem ni se kan ti. Kan enkawl zawh tawk project la ila, scheme a awm vang ringawta bawhzui lovin kan ramin a mamawh dan zawk hi lal se kan ti.
Chief Minister chuan Healthcare bill ba te, MR bill ba te tihfel kan tum zel a. GPF pawh Minister sawisak (recommend) kher lo va pek thin ni se kan ti. GPF leh pension hamthatna dang te hi kan pe chhuak hnem tawh hle, a ti. kan la a. Mahse bill hlui tak tak a la rawn thlen belh zel rih. Department dangah pawh leiba tihfel tur a la awm nual.
Chief Minister Pu Lalduhoma chuan, kalphung tharah sawrkar hnathawkte eirukna lakah kan fihlim ngei ngei tur a ni. Nangni kan Finance Officer te phei chu in dik mai a tawk lo, mi dangin mi dik in ni tih an hmuh a ngai. Sawrkarin hnathawk a lak hian human resource investment a nei tihna a ni a, kha hnathawktu kha sawrkar tana thawk chhuaktu tangkai a nihzui ngei a ngai, a ti bawk.
Hawnna inkhawm hi Pu Vanlalsawma, President, MFASA in a kaihruai a. Chief Minister-in hun a hmanpui avangin lawmthu a sawi a, MFAS member thar 10 lawmluhna a nei bawk. Pu Vanlalfaka, TO, Aizawl chuan hunserh hmangin Pu C. Lalmuanpuia, Secretary, MFASA chuan report a pe a ni. Mizoram Finance & Account Service Rules, 2021 angin post (cadre strength) hi 92 sanctioned an ni a, chung zinga 62 chu luah mek niin deputation post 2 leh ex-cadre post pakhat an luah bawk a, hna ruak hi 30 a awm mek a ni.
