“Sawrkar-in kawng siamna tur mipui hnen atanga chhiah a lak hi a hmanna tur dik takah hmang thuai rawh se” -President LDYCC

24 Sept 2026 : Lunglei District Youth Congress Committee (LDYCC) chuan ATL road chhim lam kawng chhe lutuk chu a hmunah kalin an enfiah a, ATL road nitin khualzin ṭhahnem tak ten an zawh mek chu Aizawl aṭanga chhimlam Thenzawl piah chin lam zawng chu lirthei tlan mumal theih loh khawpa a chhiat em avangin sawrkarin a rang thei ang bera a thawmṭhat hna thawk thuai turin an phut tih thuchhuah siamin an sawi.

ATL kawng chhia enfiahnaah hian LDYCC President Pu Moses Lalrinchhana Chinzah chuan, ATL Road chu Sawrkar hmasain kut an lo thlak tawh bak chu Sawrkar kal lai mekah mipui duhkhawpa hmasawnna hna thawh a ni lova, hnathawk an awm chang pawhin thawh loh ai thawk ang chauha zelthela hnathawh anih ṭhin avangin fur-in min nang hman a, mipuiin vawiinah hian kan tuar ta a ni, a ti.

ZPM-in sawrkarna an chan tirh aṭanga vawiin thlenga mipui hnen aṭanga Petrol leh Diesel kan thun apianga litre 1 ah ₹4/- min chhuhsakna barhluih chhiah a lak Vbc 50 chuang tlingkhawm tawhin, Chhim mipuite pawh hian nasa takin kan pe ve reng chunga kawng ṭha reng reng kan nei thei lo hi Chhimlam hmuhsitna nasa tak a ni, a ti a. Sawrkar hian chhiah a lak chhan tak kawng chhe siam nan hian hmang ngam se, mipuiin a tawrh theih zawng zawng kan tawrh hun kher nghak lo hian sawrkar hian a tih tur dik tak ti rawh se, ATL road mai bakah Chhim lam kawng chhe lutuk pawh LDYCC chuan a vil zui zel dawn a, Sawrkar tha ti chak turin a chhe lai siam ṭhat anih theih nan LDYCC chuan hma a la zel dawn a ni, a ti.

Haulawng khawchhung Lamṭhuam thum aṭanga Lunglei panna kawng ber chu lirthei lian (MMV & HMV) te zawh theih lovin May 2026 aṭang khan Dawn khaw lamah diversion kalpui a ni a, lirthei lian ten an zawh Zotuitlang aṭanga Dawn khaw kawng siamṭhat awm si lo leh kawng thawm ṭhat a nih chuan si loh avangin lirthei khalh tuten nasa takin an tuar mek a, hei hian lirthei lianin Lunglei khawchhunga lut turin Hrangchalkawn – Theiriat kawng a paltlang vek avangin ngaihven hlawh lo Theiriat – Hrangchalkawn kawng pawh nasa takin a chhiat belh phah a, hetianga hnathawh mumal awm chuang si lova lirthei khalh tute tana harsatna siam zawnga lirthei kal dan Haulawng aṭanga siksawi a ni hi sawrkar hian ruahmanna felfai tak siam se tih hi LDYCC duh dan a ni, a ti.

LDYCC te hi Lunglei District Congress Committte (LDCC) Treasurer Pu Eric R.Zomuanpuia leh Adviser Pu C.Robuanga ten an ṭawiawm a, kawngchhe lai leh kawng khuar laite a remchan dan angin thawm ṭhat hna an thawk nghal a ni.