01 Feb 2024: Kumin February thla (1-29 Feb, 2024) chhunga hman tur ‘Road Safety Month -2024’ chu vawiin chhun dar 12:00 khan Mizoram State Road Safety Council buatsaihin Assembly Annexe Conference Hall, Aizawlah hawn a ni. He hun hi Transport Minister Pu Vanlalhlana, Chairman, Mizoram State Road Safety Council chuan khuallian ni a hmanpuiin Road Safety Month, 2024 chu February thla chhunga Mizoram puma hman turin a hawng. Kumin Road Safety Month atan hian ‘I him theih nan Traffic Rules-te zawm thin ang che (Obey Traffic Rules for your own safety)’ tih chu thupui atan hman a ni.
Khuallian Transport Minister Pu Vanlalhlana chuan Mizoram chu mipui cheng awm zat atanga chhuta lirthei chetsualna avanga nunna chan tamna a nih dan tarlangin, kum 2021 leh 2022 dinhmun khaikhinin road accident 92.8% in a pung a, nunna chan pawh 101.79% in a pung a ni, a ti bawk a. Mipuite chu Road Safety Month hman tur pawimawhna hre thar leh a, nunna hlu tak leh sum pai tam tak hlohna chu pumpelh a nih theih nana theihtawp chhuahpuiah a sawm a. Dan hrang hrang zawm tulte tarlangin, himna tura dan siamte tha taka zawm turin a chah nghal bawk.
Transport Minister chuan sawi chhunzawmin, sawrkar kum kal mek 2023-2024 hnuaia April-December, 2023 chhungin lirthei register thar 3,01,680 a awm thu tarlangin, thla 9 chhungin kum hmasa lirthei register khum a nih thu a sawi a. Kawngpui than chak aia lirthei nasa taka pung chuan khawpui tawt siamin kawng inchuhna a siam chhoh mek zel thu sawiin, hemi karah hian lirthei khalhtute chu hawihhawmna leh Dan te ngaipawimawh chunga lirthei khalh thin turin a chah a. Licence lak dawna Dan zawm tura chahte hre reng tur leh, mipuite chu Road Safety Month hmang tangkai tur leh, Lirthei Dan leh hrai (Motor Vehicle Act & Rules) tha taka zawm mai chu himna a ni tih hre thar leh theuh turin a chah a. Road safety month hlawhtling taka hman a nih theih nan duhsakna a hlan a ni.
