Sawrkarin zirlai awm dan mila zirtirtu a siksawi thalo an tihna MZP-in an tarlang

16 July 2026: Higher & Technical Education Department-in notification ni 15 July, 2026-a a tih chhuah Notification No.A.22018/1/2023-H&TE in College zirtirtu transfer order a tih chhuah a Lunglei District-a College zirtirtute siksawi an nih dan hi Mizo Zirlai Pawl Headquarters:Lunglei chuan lungawi thlak loh a ti hle a, zirtirtu indaihlohna nasa tak awm kara hetianga zirtirtute siksawi an ni chu zirlaite hmakhua ngaih pawimawh lohnaah MZP Hqrs. Lunglei chuan a ngai, tiin vawiin khan thuchhuah siamin an sawi.

Tun tuma College zirtirtu siksawiah hian Lunglei Government College leh Government J. Buana College atangin zirtirtu pathum (3) ve ve lak chhuah niin, zirtirtu pakhat (1) ve ve chauh dah luh an ni a. Sawrkar hnathawk an nih angin Sawrkarin zirtirtute hi an siksawi thei tih kan pawm a, amaherawh chu an aiawh dah lova zirtirtute siksawi an ni thin hi MZP Hqrs.:Lunglei chuan a hrethiam lovin zirna in ngaih pawimawh tawk lohnaah a ngai a, heng an sawn chhuah tak te hi a rang thei ang bera an aiawh dah turin MZP Hqrs.:Lunglei chuan thuneitute chu a phut a ni.

Tin, Sawrkarin zirlai awm dan mila zirtirtu a siksawi thin hi MZP Hqrs Lunglei chuan tha a ti lo hle a, School/College hrang hrang a zirlai awm zat chu Mizoram District kan awmna a zirin a danglam nasa hle a, Zirlai tlemnaah leh tamnaah pawh Class/Deptt awm dan a in an reng avang leh zirtirtu mamawh dan a in an reng avangin hetianga ruahmanna siam thin hian District te zawk a zirlaite’n an tuar phah mek a, Mizoram hmun hrang hrang a zirna hmasawnna a awm theihna tur atan tun dinhmunah Sorkar ruahmanna siam chu hman chi ah MZP Hqrs.:Lunglei chuan a ngai lo a ni.

Lunglei Government College leh Government J. Buana College zirtirtute sawn chhuaha an aiawh dah lohte hi MZP Hqrs.:Lunglei chuan a rang lama an aiawh dah turin thuneitute a phut a, an aiawh dah leh dah loh chungchang hi MZP Hqrs.:Lunglei chuan a enzui zel dawn a, a tul angin hma a la chhunzawm zel dawn a ni.