School Education Minister-in UPSC Exam-a Mizo lang hlei thei ta lo tan lak a ngai a ti
04 June 2025: School Education Minister Dr Vanlalthlan’n UPSC Exam-ah Mizo kan lang hlei thei ta lo chu tan lak a ngaih thu vawiina Rangvamual-a Govt. Nepali Primary School Building sak thar a hawnnaah a sawi.
School Education Minister chuan Mizoram Education Reforms Committee-in zirna siamthat dan tur kawng a ngaihtuah chho mek a, Mizoram pumah term exam-ah Question paper in ang tlang hman te, lesson plan-ah term tina zirtirtuten an zawhpui tur chin siam te chu hma chhawp a ni mek tih sawiin, National Curriculum Framework thar a chhuak tawh a, hemi mil hian NCERT chuan text book pawh Class I,II,III &VI tichhuak tawhin, thil thar zir a ni dawn tih a sawi. Zirna pawh a danglam dawn tih sawiin, zirna kawnga hmasawn zel turin zirlaiten an zirlaiah thil chikna leh thil thar ngaihtuah chhuah theihna an neih a pawimawh hle tih a sawi bawk.
Bialtu MLA leh Adviser to CM ni bawk Pu TBC Lalvenchhunga pawhin he hunah hian thu sawiin, sorkar thar a pian hnu lawkah, Govt Nepali Primary School-in pawna class an la a hmuhin school building sak dan tur kawng a zawn nghal thu te, Samagra Shiksha leh hmun dang atanga sum an dap thute a sawi a, khawtlang hmasawnna leh changkanna kawnga ke pentir theitu chu zirna a ni, a ti.
Govt. Nepali Primary School Building thar hi chhawng hnih a ni a, class room 6, Teachers common room 1, mipa leh hmeichhe inthiarna bakah chaw chhun siamna tur kitchen te a awm a, zirlai naupang 122 leh zirtirtu 6 an awm mek bawk. (DD)
