Sept ni 11 2026 thlenga Mizotaxi App-a lirthei inziak lut – 1500 chuang tawh

12 Sept 2026: Mizoram Chief Secretary Pu Khilli Ram Meena kaihhruaina hnuaiah nimin khan Chief Secretary’s Conference Hall, MINECO-ah Coordination Committee on Traffic Management chu an thutkhawm a. Mizotaxi app hman theiha tlangzarh anih hnua Two Wheeler Taxi leh Four Wheeler Taxi inziahluh dante leh hmangtu awm dante thlirlet niin, inziah luh hun pawhsei rawtna sawi ho a ni.
 
Pu C.Lalruaia, MPS, Secretary, Transport Department tarlan danin nimin September ni 11 thlengin Mizotaxi App-a inziak lut lirthei 1570 an awm a. Heng zinga 397 chu Four Wheeler Taxi an ni a, 1149 chu Two Wheeler Taxi niin Autorickshaw 24 an tel bawk a. Mizotaxi App kaltlanga Taxi hman tum chhinchhiah zat chu 28,553 a ni. Nimin khan Taxi Driver on-line 279 an awm tih sawi a ni bawk.

Thutkhawmah hian Mizotaxi app chu State Transport Authority-in Taxi rate a bithliah dik tak hman a nih theih nante, Taxi hmangtu passenger-te him zawk nana hmanraw tangkai a nih theih thute leh Aizawl khawpui chhunga Taxi Parking Area tawt lutuk tih ziaawm nana hmanrua a nih theih dante sawi lan a ni a. Inziah luh hun pawh seina hmasa kalpui chhung khan Taxi inziak lut an thathnem thu sawi niin mipui pawhin Apps hi an hmelhriat tanin an hmang thiam chho tan mek tih sawi a ni a. Hemi avang hian Apps-a in-register duh tan thla 3 chhung hun hawn belh rawtna chu thutkhawmah hian sawi ho a ni. 

Mizotaxi App hi Mizoram Sawrkar leh Digiride Technology Pvt. Ltd., NIT(Mizoram) tangkawp buatsaih a ni.