Sikul naupang admission fee atangin thawktu mi 6 chhawr mek

14 May 2026:- Gov’t Higher Secondary School Lunglei chuan an sikul naupang admission fee atangin thawktu mi 6 an chhawr mek a, naupangte himna atana Zebra Crossing siam sak tura thuneitute an dilna chu tih hlawhtlin sak an la ni lo niin thudawnna chuan a sawi.

GHSS Lungleiah hian tun dinhmunah zirlai naupang 500 chuang hlek awm mekin zirtirtu a nghet leh casual an vaiin mi 32 an awm mek a, zirlai naupang pakhat hian admission atan Rs 3,600/- zel sengin, subject hrang hrang 10 a zir theih a ni.

Zirtirtu indaihlohna a nasat avangin he sikula thawktute chuan zirlai naupang hmankhua ngaihna avangin an admission lakna sum atangin kum 2 chuang zirtirtu 5 leh gate keeper 1 an lo chhawr tawh tih thudawnna chuan a sawi. Gate keeper an chhawrna chhan hi an sikul chu kawngpui bul maia awm anih avangin naupangte duh hun hun a an chhuah loh nan leh discipline tha zawka kenkawh anih theih nana chhawr niin an sawi.

Hetihlai hian GHSS naupangte chu Motor kawngpui chhak lama awm an nih avangin kawngpui an kan lo thei lo va, hetiang anih avang hian naupangte him zawkna atan helai hmunah hian Zebra Crossing siam sak tura thuneitute vawi tam an ngen hnuah pawh tun thleng hian an la siam sak theilo niin thudawnna chuan sawiin, an sikul atanga kal mai theihna Fly over bridge chu high sikul nen a inpawh avangin fel tawk lo va an an hriat thu leh tun dinhmunah phei chuan Fly over brigde hi high sikul a pawhna turah gate kalh vek anih thu kan thu dawnna chuan a sawi a ni.