Sikul naupangte bag rit lutuk tizangkhai tura ruahmanna siam tawh bawhzui dan thlirho
18 Oct 2024: September ni 2, 2024-a Lunglei District-a sikul naupangte sikul kai ip (bag) rit lutuk avanga zirlaite’n harsatna an tawh loh nana hma lak dan tur ruahman tawh bawhzui a nih dan chu vawiin khan Lunglei District Bawrhsap Pu R. Lalṭhazuala hovin a pisaah thlirho a ni.
He ṭhutkhawmah hian DC office aṭangin Addl DC leh SDC te, school education aṭangin SDEO South leh SDEO Lungsen te, DPO(WCD), DCPO leh DIPRO te an tel a. Ṭhutkhawm hmasaka thu rel hrang hrang bawhzui anih dan report ngaihthlak niin, hmalak zui dan tur sawiho a ni.
He ṭhutkhawma report anih danin, sikul naupang bag rit lutuk chhawk zangkhai nana School Education Department-in April ni 30, 2021-a inkaihhruaina tur thu a lo chhuah tawh chu Lunglei District Education Officer chuan government leh private sikul zawng zawngah Mizo ṭawngin a thawn chhuak tawh a. SCERT-ah sikul exam term khata zir tur ang zela zirlaibu siam tura thlen ni se, tia rel chu DC aṭangin School Education Department Secretary hnenah ziaka thlen tawh niin, zirlai naupang homework pek chungchanga ruahmanna thar siam anih theih nan rawtna thlen tel a ni bawk.
Hei bakah hian sikul tinah lekhabu dahna (bookshelf) neih theih dan tur ruahman ni se tih te; sawrkar inkaihhruaina angin ni khatah Class I & II tan subject 3, Class III – V tan subject 4, Class VI – X tan subject 6 angin class kalpui ni se tih te; homework pek chungchangah nitin primary school-ah subject 1, middle School-ah subject 2 leh high school & higher secondary school-ah subject 3 aia tam pek loh ni se tih leh sikul tinah zirlaite’n tui in tur thianghlim leh hnianghnar an neih theih nan ruahmanna siam ni se tih te chu Lunglei District chhunga sikul hrang hrangte’n an zawm leh zawm loh endik ni se, tih a ni a. Hemi atan hian inspection team din niin, October thla chawlhkar hnuhnung berah sikul endik hi kalpui ṭan ni se, tih a ni.
