12 Sept 2025: Bawngkawna silaia mi kaptu, Rochhingpuia chu vawiin khan CJM Laldinpuia Tlau Court-ah a in lan a, Zotlang All NGO huaihawtin pawikhawihtu chu a phu anga hrem tura phutin court tualah mipui an pungkhawm.
Zotlang All NGO huaihawt punkhawmah hian Zotlang YMA, Local Council, MUP, MHIP leh MGYA bakah Bualpui Welfare leh silaimu tuar Lalhriatrenga Siakeng lehkha zirpuite an tel a, mipuite chuan pawikhawihtu Rochhingpuia chu a na thei ang bera hrem an duh thu an sawi.
Akashvani Aizawl zawhna chhangin Zotlang Branch YMA Vice President Pu R.Lalduhsanga chuan pawikhawihtu Rochhingpuia chu dan lova lo sumdawng thin leh ram pawn atanga ruihhlo tawlhru thin, kum 2015-ah pawh Central YMA-te’n an lo man tawh a ni tih an hriat thu sawiin, hetianga thubuai lo nei tawh dan anga hrem ni lova, zalen taka a awm piah lamah khawlaia silaia tualthah a tum chu an rilru a na hle a ti a, vanneihthlak taka Lalhriatrenga a thih loh vang chauha tualthat lo mai chauh nia an hriat thu sawiin, court chu a phu anga rorel tura an duh thu leh bail-a a chhuah an remti dawn lo tih a sawi a, a lo chhuak leh a nih chuan a chungah engpawh thleng se veng mipuite’n mawh an phur dawn lo tih a sawi bawk a ni.
Rochhingpuia hian Zotlang veng mi Lalhriatrenga Siakeng chu Bawngkawn vengah thla hmasa ni 29 zan khan an intihbuainaah silaiin a kap a. Rochhingpuia hi man nghal niin Lalhriatrenga Siakeng chu Greenwood Hospital-ah enkawl mek a la ni a, investigation atanga an hmuhchhuah danin, a chuapah tui a tlin bakah a chuap a pan bawk a, ICU-ah la awm mekin, ventilator phawi ngam a la ni lo. (AIR)
