16 Sept 2025: All Mizoram CSS Employees Coordination Committee (AMCECC) Sub Hqrs Lunglei chuan vawiin chawhma dar 10:00 atang khan Sawrkar laka an thil phut nawr nan MIZOFED kawtah lungawilohna lantirin Sit-in Demonstration an nei.
Mizofed kawta hun an hmannaah hian AMCECC Sub Hqrs hruaitu hrang hrangte chuan thu sawiin, Mizoram sawrkarin CSS hnuaia thawkte a ngheta lakna tur dan a awm reng laia la duh lo va, Medical lama thawktute CSS Regularization Scheme hmanga lak an ni leh si chu hriatthiam har an tih thu an sawi a. Dan lo anga lak nia Sawrkar hotuten an sawi chu thinrim thlak an tih thu leh dan lo anga lak an awm anih chuan ban sela, dan lo anga latu pawh sawrkarin chhui chhuak sela hrem rawh se ti bawkin, an thil phutte sawrkarin a tihhlawhtlin hma chuan hmalak chhun zawm zel an tum thu leh tlawm mai mai an tum lo tih an sawi.
Kan palaiin a sawi danin, September ni 9, 2025 atanga CSS hnuaia thawktuten Sawrkar laka lungawilohna an lantir atangin Lunglei khawpuiah pawh Sawrkar Office hrang hrangah thawktute indaihlohna a nasa hle a ni.
