11 March 2025: Chief Minister Pu Lalduhoma chuan, sorkar kum kal meka sorkar leiba chu Rs vbch 12082.26 a ni a ti a, sorkar chuan kum kal mekah Rs vbch sang 1 chuangin leiba a ti tlahniam niin a sawi.
Vawiin Budget session thutkhawmah, Dr. K.Beichhua zawhna chhangin, Finance department changtu, Chief Minister chuan, sorkar leibatna te chu House in a pass pui, puk theih chin tura tih pawisa an puk te, SASCI loan dawn that avanga leiba pung bakah, sorkar hmasa a leiba an chhawm te nen leiba chu a tam chho zel a ti a, engemawzata leiba an titlahniam chung pawhin sorkar leiba chu a la tam hle a ti a, tun Financial Year, 2024-2025 a leibat zat tur estimate aia revised estimate a tlem zawkna chu Rs vbch 1003.94 a tling a ti. Hemi awmzia chu tun sokar kum kal mekah sorkar leiba chu Rs vbch 1000 chuangin an ti tlahniam niin a sawi.
MR bill ba chungchang sawiin, Chief Minister chuan tuna MR bill la pekchhuah loh chu tun sorkar kum chhungin pek chhuah vek a ni dawn a ti bawk a, GPF leh Pension te erawh lut leh chhuak reng a nih avangin clear vek thei dinhmunah an ding lo va, tun dinhmunah chuan an pe thei deuh zel tih a sawi bawk. (DD)
