15 April 2025: Mizoram sorkar hnuaia CSS hnathawkten dahnghehna tur dan a taka kalpui an phut avanga an nawrh chungchangah Chief Secretary charge la mektu, Pu H.Lalengmawia chuan, thawktu tam zawk chu dan lo va lak an nih avangin dahngheh theih an ni lo niin a sawi.
All Mizoram CSS Employees Coordition Committee (AMCECC) ten vawiin ni 15 atanga ni 17 thleng hnathawk lo va nawrh an huaihawt chungchangah vawiin khan Chief Secretary charge la mektu, Commmissioner & Secretary, Pu H.Lalengmawia chuan CS conference hall-ah thuthar lakhawmtute kawmin, Centrally Sponsored Scheme-CSS hnuaia thawk tam tak chu dan lo anga lak niin a sawi a, hei hi anmahni thiam loh vang reng erawh a ni lo a ti a, Advertisement awm lo leh DPC kaltlanga lak an nih loh bakah, recruitment mumal taka open-competition-a lak ni lo an ni a ti a, hetianga lakte hi dan anga dahngheh theih an ni lo tiin, sorkar tharin CSS thawktute dahnghehna tur Scheme a siam pawh dan anga lak te hman theih tur a ni, a ti.
Pu H.Lalengmawia chuan, CSS hnuaia thawkten Sorkar an nawrh khum chu sut leh vat turin an duh a ti a, boruak a sosang zel anih chuan sorkar chuan ‘no pay, no work’ bakah an service tihtawp sak thleng pawha hmalak a ni lo ang tih sawi theih a ni lo a ti.
Hetihlai hian AMCECC-te chuan, Mizoram sorkar hnuaia CSS hnathawkte ngheh theihna tur dan, Govt. of Mizoram regularization of CSS Employees Scheme, 2024, nikum June ni 18-a siam tawh chu a taka a hlawhtlin an beisei laia nikum October ni 21 a DP&AR office memorandum chhuaka checklist in a dal leh tak avangin sorkar an nawr a ngai ta an ti a, an thil phut nawr nan vawiin atanga naktip thleng hnathawk lovin pisa an kai dawn a ni. (DD)
