18 March 2025: Chief Minister Pu Lalduhoma, Finance changtu ni bawk chuan March ni 17, 2025-a sorkar sum neih zat chu Rs vbch 1379.35 a nih thu House a hrilh.
Mizoram Legislative Assembly pakuana thutkhawm vawi 4-na, Budget Session ni bawk ni 12-na vawiina neihah House Leader ni bawk Pu Lalduhoma chuan Congress MLA Pu C Ngunlianchunga zawhna chhangin sorkar tharah hian Reserve Bank of India (RBI) Treasury Bill Holdings-a Mizoram sum leh pai dinhmun hnuhnung ber, February 15, 2025 report-ah chuan Rs vbch 895.08 a nih thu House a hrilh a, ni tina danglam thin a nih angin March ni 17, 2025-a sorkar sum neih zat chu Rs vbch 1379.35 a nih thu a sawi a ni.
MLA Pu H Ginzalala’n Work Order awm lo va hnathawh chungchang a zawh belhna chhangin chutiang chu a tam thu a sawi a, kum thum china upa, contract pek tawh, hna thawk tawh chin chu bill an pek thu sawiin, hna la thawh loh eng emaw zat chu lapse deposit-ah an puan tawh thu a sawi bawk.
MLA Pu Robert Romawia Royte hna chan thinah Work Order tel lo va hnathawh a tam thu a sawi a, work order awm lo va hnathawh awm hrang hrang awm a sawilang a, chutiang chu sorkar kalphung tharah chuan awm tawh lo tura an ngaih thu a sawi bawk a ni. (DD)
