08 Sept 2025: Vawiin chawhnu dar 2:00 khan Lungleia Pawl hrang hrang hruaitute chuan MJA Lunglei ruahmannain Lunglei Press Club-ah Mizoram State University (MSU) Lunglei hmuna dah anih theih dan tur chungchangah inrawn khawmna an nei.
Inrawn khawmna hun hi Pu H.Lalthansanga MJA Dist Hqrs Lunglei President-in a kaihruaia, Pu Thanghmingliana Secretary MJA Lunglei chuan pawl hrang hrang an sawm khawm chhan te a sawifiah.
He huna tel pawl hrang hrang aiawh, YMA Sub Hqrs Lunglei, MZP leh MSU-te’n an hmalak tawhna te report pein Chhimbial Chhantu President chuan MSU Lungleia awm ngei an duh avangin MJA te pawh hun buatsaih sak tura ngen an nih thu leh chhim lam tana malsawmna awm ve tur Aizawl lama dah zel tum ringawt chu veiawm a tih thu a sawi a. Lunglei Thalai Pawl hruaitu aiawh pawhin LTP-in State University Lungleia awm ngei tura an duh thu leh Sawrkarin a duh leh duhloh a nih mai thu a sawi a, MHIP Sub Hqrs President pawhin State University chu Lungleiah awm ngei se an duh thu leh hmalakna ang ang thlawp an tum tih a sawi.
Vawiina pawl hrang hrang aiawh-a thusawitute hian January thlaa NGO Coordination Committee-in Sawrkar a lo ngen tawh laia engmah chhanna awm lo va, Assembly-ah Aizawla awm tura Bill Pass hnan an ni chu tha nat thlak an tih thu an sawi.
Vawiina Lungleia tlawmngai pawl hrang hrang paruk hruaitute leh MJA Lunglei hruaitute kalkhawm chuan State University Demand Committee Lunglei din nise, MSU leh MZP ten hma lo la se, a rang thei ang bera hmalak chhunzawm nghal nise an ti. MHIP leh YMA erawh chuan Demand Committee a tel leh tel loh tur hi an pawl Executive meeting-ah sawiho hmasak phawt a tul thu an sawi.
