Sum kawngbo a awm loh thu tarlang

26 May 2026: LMC Ward No-IV Councillor Pu Lalramzauva leh Ward Committee te chuan vawiin chawhma dar 11:00 khan LMC Office, BoC Hall-ah Chanchinbumite kawmin Ward sum an hmuh dan leh an hmanna te an hrilh.

Councillor Pu Lalramzauva kaihhruai Chanchinbumite an kawmnaah hian Pu Lalramzauva chuan kum 2024 atanga 2026 March thla thlengin LMC, Ward No-IV chuan sum Rs 1,02,51,293.86 an hmu tawh tih tarlangin; an sum hmuhnate chu ULB & Ward Developement Fund- Rs 68,29,000, Property Tax- 7,50,902, LMC Departmental Works- Rs 4,01,400, Pahoss/SPP- Rs 22,69,991.86 te a ni.

ULB & Ward Fund sum atang hian Ward chhung veng pahnih Venglai leh Venghlunah hmasawnna hna hrang hrang an thawh bakah CCTV Rs Nuai 7 chuang man an fit. Hei bakah hian Sports lama hmasawnna atan leh Water Filter zirna In hrang hranga dah nan te hman a ni.

Property Tax bik atanga sum hmuh atangin Venglaiah hmun thum leh Venghlunah hmun khatah hnathawh niin, LMC Departmental Works hnuaiah Venglaiah hmun ngaah hnathawh a ni bawk. Heng bakah hian Zirna In paruk leh Community Hall-ah Syntex dah sak an nih bakah Zirna In pariat leh Biakin pakhatah te Water Filter dah sak an ni a, Street Light thahnem tak dah thar a ni bawk tih vawiina Chanchinbumi te an kawmnaah hian Ward No- IV Councillor chuan tarlangin, sum an hmuh ang ang chu chengkhatmah kawngbo awm lovin a hmanna tur dik takah hman a ni a ti.