May 2, 2024: India ram rorelna in sang ber Supreme Court chuan Mizoram Sawrkar leh NHIDCL te chu phalna tello a ramngaw humhalh huam chhunga hmasawnna hna an kalpui nia puhna thubuaiah insawifiah turin a ti.
Supreme Court hian, Reverine Reserved Forests leh Roadside Reserved forest huamchhung ramah te Forest Department phalna tello a hmasawnna hnathawh tir avanga Mizoram Sawrkar leh National Highways & Infrastructure Development Corporation Limited (NHIDCL) te laka thubuai chungchangah Mizoram sorkar leh NHIDCL te chu Legal notice pein, insawifiah turin a ti a ni.
Supreme Court Judge pahnih, Justice B R Gavai leh Justice Sandeep Mehta te chuan he thubuai hi uluk taka an en hnuah, Gauhati High Court Single Bench in kum 2021-a Mizorama Riverine Reserved Forests leh Road side Reserved Forests chunchanga Mizoram Sorkar Notification chu a pawm tlak loh a tih tawhna leh forest in a huam chin 1929.7 sq km-a alo tih tet thu a puan tawh chu, Mizoram Sorkarin hma an lak loh avangin Judge chuan mak an ti hle a, Mizoram Sorkar chu thil pawimawh tak enliam a, Environment humna Dan an palzutin an ngai pawimawh lo hle tih an sawi.
Mizoram atanga petition thehluttute tana ding, Advocate Gaurav Kumar Bansal chuan Forest Department phalna lak ngei ngei tur la hmasa lo in heng ramngaw humhalh huamchhung ah hian Mizoram Environment, Forests and Climate Change Dept. Secretary chuan hnathawh a lo phalsak tih Supreme Court chu a hriattir a, hei hian Forest Conservation Act, 1980 hnuaia ramngaw ti chereu lo tura ramngaw humhalhna siamte a kalh tih sawiin, hei bakah hian Environment Forest and Climate Change, Department thuneitu sangte meeting in ramngaw Sq. km 1929.7 vela zau, Reverine Reserved Forests hnuaia mi humhalh tura thutlukna a lo siam tawh chu ngaihthah a ni tiin court ah hian a thlen bawk. Supreme Court chuan he thubuai chungchanga Hearing neih leh hun tur atan July ni 24 a ruat a, hemi hma ngei hian Mizoram Sorkar leh NHIDCL te chu insawifiah turin a ti a ni. (DD)
