19 Sept 2025: Vawiin khan Tawipui North-I ram Bawktlang hmunah Vansang leh Ngengrual Zaua lo neitute pualin ‘Farmers Field Day’ Programme hman a ni.
Hemi puala inkhawm tawi Bawktlang rama neih hi Pi Lalzuimawii, Vice President Tawipui North – I, V.C-in a kaihruaia, hun hmanpuitu DAO Lunglei thawktute chungah lawmthu a sawi.
Hun hmanpuitu Lunglei District Agriculture Officer, Pu VL Hmangaihchhunga chuan thu sawiin, Tawipui North – I chu khawtlang hruaitute leh Loneitute thawhho thatna ber pawl nia a hriat thu sawiin, thawhhona tha an neih avanga an hnathawh rah chhuah hmuhnawm tak chu lo awm thei a ni a ti a, an Hmarcha thar chhuah hmanga mahni kawtkaia sum tam tak an lalut thei turte chu lawmawm a tih thu a sawi.
DAO chuan tunah hian kuthnathawh hi awmzia a awm tan tawh tih a takin kan hmu chho zel a, hmun hla tak taka tharchhuahte phurh kual ngai lovin mahni kawtkaiah kan hralh thei tawh a ni a ti. Hetihlai hian thil hi tam kan ti hma lutuk a, tam kan tih hi a tam thin loh avangin tharchhuah tam deuh deuh kan tum tur a ni tiin, Tawipui North – I khuaa Loneitute’n harsatna an neih chuan Department-ah sawi hreh lo tur leh a theih ang anga tanpui an inhuam thu a sawi.
Vansang leh Ngengrual Zauah hian Chhungkaw 30-in thlawhhma lain Buh leh Hmarcha bakah thlai dangte an ching a ni.
Vawiina Farmers Field Day an hmannaah hian Loneitu thahnem tak bakah District Agriculture Office Lungleia thawktute leh Media lamte telin, Lo an zo nghal bawk a ni. He hunah hian Tawipui North – I VCP Pu Lalbiakngheta leh Dr.Vanlalchhandama-te’n thu an sawi bawk.
