TB veite eitur tha pek kawnga thawh hlawkte hnenah Larsap-in chawimawina a hlan
06 Aug 2025: Vawiin khan Mizoram Larsap, General Vijay Kumar Singh hovin Raj Bhavan-ah Pradhan Mantri TB Mukt Bharat Abhiyaan programme hman a ni a. He hunah hian Food Basket Support hnuaia TB veite tana eitur hrisel leh tha thawhtu, Nikshay Mitra-thawh hlawkte chawimawina hun hman a nih bakah, Food Basket Support kaltlang hian TB veite hnenah eitur tha sem chhuah a ni. He hun hi Health & Family Welfare Minister Pi Lalrinpuii chuan a telpui bawk.
Larsap General Vijay Kumar Singh chuan, TB veite hmakhua ngaia theihtawp chhuahtu Health Minister, Health Department-a thawktute leh eitur tha an dawn theih nana sum leh pai thawhtu Nikshay Mitra-te hmalakna chhuanawm a tih thu a sawi a. Mizorama TB vei enkawl mek mi 1,501 zinga 117 te chauhin Food Basket Support kaltlanga eitur tha an dawng leh a tam zawkin an la dawng lo chu veiawm a tih thu sawiin, Food Basket hmalakna a thlawp zia lantir nan TB vei mi 10 te tana eitur tha pek a tum thu a puang a. Mizoram chu India rama TB awm lohna State hmasa bera siam thei tura theihtawp chhuahpuiah Mizo mipuite a sawm nghal bawk.
Health Minister Pi Lalrinpuii chuan TB do kawngah Sawrkarin theihtawp a chhuah mek zel thu leh Damdawiin hrang hrangte pawh thuam chak mek zel a nih thu sawiin, TB test leh damdawi man a thlawn veka kalpui a nih bakah ei tur tha leina tur Rs 1,000/- account-ah thun thin a nih thu a sawi a. TB chu thuawihna leh tanrualna hmanga hneh theih a nih thu a sawi bawk.
He hunah hian Food Basket Support kaltlanga TB veite eitur tha pek kawnga thawh hlawk tak Nikshay Mitra pahnih – NEDFi leh Dr. Laxmi Narayan te hnenah Larsap-in chawimawina a hlan a. TB vei mi 4 te hnenah Food Basket hlan a nih bakah NEDFi in TB vei mi 100 te Food Basket Support kaltlanga an chhawmdawlna tur Rs 4,90,000/- cheque chu TB veite aiawhin Larsap chuan a dawn sak nghal bawk.
He huna tarlan nih dan chuan Mizoramah TB vei enkawl mi 1,501 awm mekin, heng zinga 117 te hian Food Basket chhawmdawlna an dawng a, hei hi 7.8% a ni. India ram State/UT te TB score siamah Mizoramin point 68 hmuin 12-na dinhmun a hauh a, a hlawhtlinna rate hi 79.50% niin, TB vei zinga 5% velin an thihpui anga chhut a ni. (DIPR)
