The Mizoram Liquor (Prohibition) Act 2019 hnuaiah zu a tam niin Mizoram Aam Aadmi Party-in an sawi
Mizoram Aam Aadmi Party chuan Zu khap anih chuan sawrkarin a khap rem ngei tur a ni a, a theilo anih chuan sawrkar chuan hlauh neilo leh dan fel tak hnuaiah zu zuar ngam zawk rawh se an ti.
Aug ni 22, 2023-ah Mizoram Aam Aadmi Party chuan Aizawlah thuthar thehdarhtute an kawm a, an party Vice President Pu Lalngaihawma Pachuau chuan Zu chungchang an ngaih pawimawh thu leh zu avangin Mizoram mipui a bik takin Mizo thalaiten an tuar nasa em em a ni, a ti. Tun dinhmunah Aizawl hmun hrang hranga Damdawiin te leh Doctor-te an zawh kualnaah tunhnaia medical case awm zinga a tam zawk chu mipa niin Zu vang anih thu leh tunhnaia thihna tam zawk chu zu kaihhnawih natna avanga thi an nih an rin thu a sawi a ni.
Pu Lalngaihawma Pachuau chuan Mizoram a zu khap burna hman mek, The Mizoram Liquor (Prohibition) Act 2019 hnuaiah zu a tam thu leh hmun hrang hrangah ualau takin lei tur a awm reng a, heng hi zu chhe ber chi emaw tih mai tur a ni, a ti a. Hetiang hnihne a khap ai chuan sawrkar hian hlauh neilo leh dan fel tak hnuaiah Mizo thalaite tan zu hi zuar ngam zawk rawh se, a ti bawk.
Mizoram AAP chuan zu chungchangah hian inzirtina tha Mizote hian an mamawh hle a an hriat thu leh he mi tur atan hian Kohhran te, Zirnain leh NGO te tangruala zu chungchangah zirtirna tha kalpui turin an ngenin an sawm nghal a ni.
AAP Party chuan rorelna dawhkan an chelh anih ngai chuan Industrial policy hnuaiah Mizo buh leh heng thei hrang hrang, lakhuihthei, dragonfruit, balhla, kawlthei, fu, sawhthing leh adangte hmangin Mizo zu chi hrang hrang, wine leh beer te dan fel tak hnuaiah siam a ni ang a. Hei hi kut hnathawktute khai chhuah theihna Policy pawimawh tak pakhat anih dawn bakah Mizoram pawn thlenga hralh chhuah tlak khawpin hma an la dawn a ti a. Tourism thlenga Mizoram tan sum tam tak siamna a ni dawn bawk a ni, a ti.
India leh Foreign Made Liquor chung changah erawh chuan mipuiah opinion poll an la thung dawn tih sawiin a duh tam zawkna chu sawrkarin a kalpui dan tur a ni ang, a ti.
