22 Nov 2023: Khamrang-a cheng thin, Myanmar mi Mangtindam, tleirawl kum 14 mi Bike-a a tlanbo pui hnua pawngsual zuitu chu court-in thiamloh a chantir a, a hremna tur hi naktuk khian puan a ni ang.
Kolasib Fast Track Court-ah he thubuai chungchang hi ngaihtuah a ni a, Judge Pu R.Vanlalena chuan vawiin khan court thutlukna hi a puang a, Mangtindam Manga ti a koh hi tunah Kolasib District Jail ah a tang mek a ni.
Kolasib khaw bul lawk, thingtlang khaw pakhata cheng pa pakhat chuan a fanu kum 14-a upa chu Mangtindam-a chuan a Bike-a a tlanbo pui hnuah a pawngsual zui nia sawiin, November ni 26 2020 khan Kolasib Police station-ah FIR a theh lut a. Thubuai hi Kolasib Police te chuan chhui zui nghalin hmeichhe tleirawl tlanbo puitu leh pawngsualtu a puh Mangtindam Khamrang khua a cheng thin chu ni hemi ni vek November ni 26 2020 khan an man nghal a.
Pawngsualtu hian hmeichhe tleirawl hi a pate phalna la hmasain tlai chaw eipuiah a sawm chhuak a, nimahse tlai chaw ei kham hnuah pawh hawpui lovin a pawngsual ta ni a sawi a ni. Mangtindam lakah hian Kolasib Police te chuan mi rukbo thubuai Section 363 IPC leh kum tlinglo pawngsual thubuai Section 6 of Protection of Children From Sexual Offences Act, 2012 chu an ziak lut nghal bawk. (AIR Aizawl)
