Thingtlang lam tih hmasawnna tura sawrkar flagship Programme hrang hrang zirho a ni

08 Nov 2025: Vawiin khan Rural Development & Administration Department hnuaia Officer-te pualin thingtlang lam tih hmasawnna tur leh rethei zawkte’n leirem an rah theihna tura sawrkar flagship Programme hrang hrang – National Rural Livelihood Mission (NRLM), Lakhpati didi, Deen Dayal Upadhyaya Grameen Kaushalya Yojana (DDU-GKY) leh thil dangte zirhona leh hmalaknate thlirleta, sawihona hun, Aijal Club-ah buatsaih a ni a; RD&AD Minister Prof. Lalnilawma’n he hun hi hmanpuiin, RD&AD Commissioner & Secretary leh MzSRLM State Mission Director ni bawk Pu R. Zarzosanga’n inkhawm hi a kaihruai a; State, District leh Block level-a Officer-te he hunah hian an tel a ni.

Minister chuan Mizorama thingtlang khuate tih hmasawn nan Vibrant Village Programme (VVP), khaw 109-ah kalpui tan a nih tur thu leh thingtlang khua chengte leh a bikin nuhote’n eizawnna tha zawk an neih theih nan sawrkar chuan RD&AD hnuaia Mizoram State Rural Livelihood Mission (MzSRLM) kaltlangin, theihtawpa hma a lak mek thu a sawi a; Minister chuan Mizorama Self Help Group (SHG) te chak zawk leh awmze nei zawka an kal theih dan tur chu a thil ngaih pawimawh a nih thu sawiin SHG-te thil thar chhuah leh siam chhuahte, zau zawk leh hlawk zawka zawrh leh hralh a nih theih nan tunhnai-ah SELHEL Brand thar din a nih thu te a sawi a. he hun hmanga kalkhawm Officer rualte chu thahnem ngaia, theihtawp chhuahpui turin a sawm a ni.

Tun dinhmunah MzSRLM hnuaiah hian thawktu mi 360 awm mekin, state level-ah mi 39, District level-ah 25 leh Block level-ah mi 296 an awm mek a, 90% post hnawh khah niin India rama ti tha berte zingah Mizoram chu a awm mek a; Self Help Group hi 11,257 awm mekin Village Organization 759 leh Cluster Level Federation 84 a awm a; Lakhpati Didi (SHG member kum khata net income Rs nuai 1 chunglam nei) mi 13,552 an awm mek a ni.

Tun dinhmunah DDU-GKY hnuaiah thalai training chhuak tawh 3652 awmin, heng zinga mi 2136 te chu Mizoram chhungah leh India ram khawpui hrang hranga 5-star hotel leh Resort-ah te, company leh BPO lian tak takah te, airline Cabin Crew  te leh India rama Airport lian tak takah te an thawk mek a ni. (DIPR)