Thla 5 chhungin Mizoram Police-te’n Heroin tualchhunga hralh dana Rs Vbch 11 leh Nuai 59 chuang hu an man
Kumin January thla atanga May thla tawp thleng khan Mizoram Police-te’n Heroin kg 38 leh gram 651 an man.
IGP (Law & Order) Pu Lalbiakthanga Khiangte hnen atanga thu dawn danin thla 5 chhunga Police-te Heroin man hi tualchhunga an hralh danin Rs Vaibelchhe 11 leh Nuai 59 chuang hu a ni a. Heroin tawlh man-chhuah chungchangah hian Police-te chuan Mizoram hmun hrang hrangah thubuai 154 ziak lutin inhnamhnawiha puh mi 209 an man tawh a ni. Police-te hian thla 5 chhung vek hian Methamphetamine kg 89 leh gram 445 an man a, an Methamphetamine man hi Rs Vbch 11 leh Nuai 62 hu niin an chhut a. Methamphetamine bakah hian a muma siam ni ve lo Crystal Meth kg 13 leh gram 49 an man bawk a. Crystal Meth hi a to hle niin an sawi a, an man hi Rs Vbch 40 leh Nuai 47 hu zet niin an sawi. Methamphetamine leh Crystal Meth kaihhnawihah hian thubuai 11 ziahluh a ni a, mi 17 man an ni.
Nikum 2023 kha Mizoram-a Police-te’n Heroin an man tam ber kum a la ni a, nikum chhung khan Heroin kg 68 leh gram 55 an man a. A hun laia tualchhunga Heroin an hralhna rate-ah chuan Rs vbch 20 leh nuai 41 hu ni-a chhut a ni. Nikum chhung vek khan Methamphetamine kg 154 leh gram 172 an man a, a hun lai rate angin Rs vbch 20 leh nuai 4 hu a ni a. Crystal Meth hi kg 49 leh gram 5 an man a, hei hi a hun laia tualchhunga an hralhna rate chu Rs vbch 147 leh nuai 1 hu a ni an ti. Nikum chhung vek hian Methamphetamine siamna atana an hman Pseudoephedrine kg 210 leh gram 72 zet man a ni bawk.
Nikum 2023 mchhung khan Heroin tawlhruk kaihhnawihah thubuai 232 ziaklutin, mi 325 man an ni bawk a. Methamphetamine tawlh chungchangah thubuai 16 ziaklutin mi 25 man an ni a. Crystal Meth chung-changah thubuai 6 ziaklutin, mi 9 man a ni bawk a ni.
Mizorama inbun dan kengkawhtu pawl (law enforcement agency) hrang hrangte chuan Methamphetamine hi Mizoramah hmang an la awm rih lo ni-a an hriat thu leh Mizoram pawna thawnchhuah tura Myanmar atanga tawlhruk thin a nih thu an sawi a. India rama damdawi atana siam Pseudoephedrine hi Myanmar-ah to taka hralhin chu chu Methamphetamine siamna atan an lo hmang a, Mizoram kaltlangin an hralh leh thin niin an sawi.
(AIR Aizawl)
