Tlungvel khua a tlang hrileng, khawsik, khuh leh hritlang avanga sample 43 an lak endik zingah mi 32 te chu H1N1 hri kai an ni tih hmuhchhuah a ni.
Health & Family Welfare hotute hnen atanga thudawn danin Tlungvel khua-ah hian Sept ni 17 leh ni 28 chhung khan hritlang khawsik leh khuh vei mi 245 chu Tlungvel Health & wellness centre-ah an inentir a. Hetiang anih avang hian Tlungvel khua hi ‘hri lenna khua’ a puan a ni a. Thawhtanni khan Thingsulthliah PHC-a laboratory technician chu tirin mi 43 sample a la a. Hei hi Thawhlehni khan Aizawl lamah thawn thlain Zoram Medical College-ah endik a ni a. Sample 43 zinga 32-te chu hritlang chi khat H1N1 kai an ni tih finfiah a ni a. H1N1 hi ‘influenza ‘A’ virus’ tiin an sawi a, sawi dan thenkhatah chuan ‘swine flu’ an ti bawk a ni.
Doctor-te chuan hritlang kaite hi ngaihtuahawm leh na tak an awm lo niin an sawi a, mi 245 zinga a tam zawk hi dam tawhin mi 70 vel erawh chu an hritlang leh khuh a la dam chiang lo niin an sawi. Hemi hma September ni 25 khan
‘Chana Pawl’ ti a sawite chenna Chhuanthar Tlangnuam khua-ah pawh hritlang khawsik a damlo hi mi 233 vel an awm a. An zinga mi 35-te sample endikna-ah an vai hian H1N1 hritlang natna an vei tih hmuhchhuah a ni tawh bawk. Mithiamte chuan H1N1 hi natna inkaichhawn awlsam tak a ni chungin hlauhawm lutuk a nih loh thu an sawi.
Tlungvel-ah hian gospel camping an buatsaihna-ah a darh ni a hriat a ni a. Kar leh lama Presbytery inkhawmpui an thlen leh dawn avangin inkaidarh lo tura fimkhur a tul hle a an hriat thu an sawi a. Chhuanthar Tlangnuam khua-ah hian sikul atanga inkaidarh an ni a hriat a ni bawk. (AIR)
