Tourism minister-in Khualzinte thlenna tur khualbuk a hawng

21 Aug 2026: Vawiin khan Tourism Minister Pu Lalnghinglova Hmar chuan Multipurpose Hall, Berawtlang-ah, ‘Development of Beraw Tourist Resort’ project hnuaia khualbuk sak thar a hawng.

Khuallian Minister Pu Lalnghinglova Hmar chuan tunhnaiah Mizoramah tourist an pung nasa a, tourism sector chu Mizoram tan sum hai luhna hnar tha tak a ni chho mek a ti.

Minister chuan 2024-2025 aiin 2025-2026 chhungin Mizoram tlawhtu khualzin nuai 4 chuanga an pun thu sawiin, ram pawn atanga lo kal pawh kum hmasa aiin 9000 chuangin an pung, a ti.

Tourism sector chu mi tam tak tan eizawnna siamsak theitu anih avangin, sawrkar leh mipui tanrual a ngai a, khawtlang hruaitute nen pawh inhrethiam taka thawh ho a tul a ni, a ti a. A hlawkna tak tak hmutu tur chu Mizoram mipuite an nih avangin, ram hmasawnna tura theihtawp chhuahpui zel turin kalkhawmte chu a fuih a ni.

Development of Beraw Tourist Resort project atan hian cheng nuai 606 sen a ni a. Khualzinte thlenna tur khualbuk (building) panga hawn thar niin, bedroom pahnih theuh a awm a, a bang atan hian hmun hrang hrang atanga lakkhawm lung tha bik hman niin, a chhung pawh khualzinte tana nuam thei ang ber tura chei mawi a ni.

MTDA Chief Executive Officer Pi R. Lalrodingi chuan programme kaihruaiin, Assistant Engineer Pu. K. Lalruatsanga chuan  technical report a pe  a.  Tourism department hruaitute leh MHIP, MUP leh  JAC-te bakah  Local Council hruaitute an tel a. Tourism Joint Director Pi Lalthakimi Pachuau chuan lawmthu sawiin hun hi a khar a ni. (DIPR)