27 Jan 2024: MTP Hqrs. President Pu Pakhaw Chozah chuan K.L.Zoasa tualthih thu ah MTP Hqrs demna leh tualthattu hum tum ang hiala puh an ni chu hriatthiam harsa a tih thu a sawi a, he chhiatna thleng chungchanga an hmalak dan chu vawiin khan thuthar thehdarhtute a hrilhfiah a, he chhiatna rapthlak tak thleng avanga mipui, MTP member-te leh CYLA hruaitu leh YLA branch-te thawhhona leh inpeknaah lawmthu a sawi a ni.
MTP Hqrs Gen Secy Pu Israel chozah sawi danin, ruang an dahna hrilh turin Tuipui ferry atangin tualthattute zinga mi pakhat an hruai a, nasa takin police nen inchuhin ruang an hmuh hnu ah pawh Police-ten Lawngtlai chhuahsan thei lo tura an danbeh tlat hnuah MTP Hqrs leh CYLA-te nen tangdunin theihtawpin an innawr a, hemi hnu hian an thutiam ang ngeiin tualthattu hi Tuipui Ferry thlenpui a ni a, hetah hian IR police tam tak nen innawrin police-in an tam hneh em avangin tualthattu hi Police-in an la a, hliam leh kut inthlak pawh a awm nual a ni, a ti.
He tualthihna chungchangah hian Sr.Vice President Pu S.Vabeihasa, Pu N.Solomon AGS leh Rev.VL.Ngaia Adviser MTP Hqrs. te pawhin an thil tawn leh hmalak dan sawifiahin MTP Hqrs hi a thutiamah a ding nghet a, tualthattu ngei pawh hi Mara leilung thlenpui a ni a, MTP Hqrs demna leh tualthattu hum tum ang hial puh an ni chu hriatthiam harsa an tih thu a sawi. Hetih rualin KL.Zoasa thihna chungchang a tha leh zung sum leh pai nena thawktute pawl hrang hrang te leh Zoasa tuarpuitu zawng zawng chungah MTP Hqrs. chuan lawmthu an sawi a, he tualthahna thleng avang hian CYLA leh MTP Hqrs thawhhona pawh nghet leh zualin a kal mek tih sawiin, mipui leh thalai rual zingah tawngkam duhtui lo an awm palh a nih pawhin MTP Hqrs chuan hriathiam a dil a, hetiang rikrum thil thlengah hian hruaitute zai ngaithiam thin turin mipuite an ngen bawk. (AIR)
