02 Jan 2024: December ni 29-a Lawngtlai district Tuisentlanga lut Myanmar sipai 151 te chu vawiin chawhnu lam khan Myanmar thlawhna in Lengpui Airport atangin an ram lam ah a hruai.
Myanmar thlawhna hian tum hnih thiarin, a tumkhat nan Myanmar Sipai 84 phurchhuak phawtin, chawhnu dar 3:24 khan a tum hnih nan Sipai 67 a phurchhuak leh a, tihian December 29, 2023 a Myanmar Sipai tlanchhia, Lawngtlai District chhung, Tuisentlang a rawn lutte chu an ram ah phurlet an ni vek tawh.
Myanmar sipaite hi an awmna hmun, Parva epa Myeik Wa Camp an tih mai chu December ni 29 a Arakan Army hel pawlte’n an luh chhuah a an laksak avangin Tuisentlang khua-ah an lut a. A tirah mi 83 lut phawtin zan lamah mi 68 an lut leh a, an vai hian mi 151 an ni. An zingah hian hliam 9 an awm a, chu’ng zingah chuan hliam na zual 4 an awm ni a thudawn a ni.
An ralthuam rawn luhpuite chu – Rifle 93, pistol 17, Rocket Propelled Grenade (RPG) 4, Mortar 4, Medium Machine Gun (MMG) 2, Light Machine Gun (LMG) 5, Sniper rifle 4 leh hand grenade 374 te a ni. (AIR)
