“Tuna M.P inthlan kan hmachhawn tur hi Kristiante kan dam khawchhuahna atana indona a ni” – Pu Lalbiakzama MPCC, M.P Candidate
01 April 2024: M.P inthlanpui lo awm tur atan vawiin tlai dar 3:00 khan Mizofed kawt Venglai Lungleiah Lunglei Dist Congress Committee buatsaihin Street Campaign neih niin Pu K.L. Chhawnzauva LDCC President chuan inkhawm kaihruaiin Rev. V. Vanlalchhunga BCM-in hunserh a hmang.
LDCC buatsaih Street Campaign-ah hian Pu Lalbiakzama MPCC, M.P Candidate chuan thu sawiin, Kristiante leh Muslim sakhua hnawksak minti em em tu Hindu firfiak RSS kan tihte Party chu BJP hi a ni a ti a, BJP Party thil tum pui ber chu India ram hi Hindu Lalna ram a ni a, chumi tihlawhtling tur chuan tlawm leh zah pawh dawn lovin theihtawp an chhuah a ni a ti. Tuna M.P inthlan kan hmachhawn tur hi tualchhung Party te indona a ni lo va Kristiante kan dam khawchhuahna atana indona a ni a ti.
Pu Lalbiakzama chuan BJP sawrkar chuan an mi duh zawng Central sawrkara nihna pawimawh tak takah dahin an mahni tibuai thei tur Party dang hruaitute chhuanlam fahrah te te siamin an man a, Kristiante sawrkar dangah pawh khawilaiah emaw harsatna han tawh ve zeuh a awm thin a, mahse pawi khawitute sawrkarin rang takin a man nghal thin a, tunah erawh chuan Kristian te harsatna siamtute chu Police hnenah pawh report thin mahse man an nih ngailoh mai bakah ram hruaitute chu tumah an tawng chhuak duh ngailo a ti. Kan thenawm mai Manipur a tlangmi pui leh Kristianten harsatna nasa tak an tawh lai pawhin kan Prime minister chuan vawikhat pawh a tlawh duhloh bakah vawikhat pawh an thlavang hauhin a tawng chhuak duhlo tih Pu Biakzama chuan a sawi bawk.
Tuna BJP Sawrkarin a pass tak UCC chu India ram dan a nih miau avangin kan ram tan hian a hlauhawm a ni Pu Biakzama chuan tiin, kan hnam tihdan leh inhung bikna kan neih neuh neuh hi min thiah sak ngam dawn a ni a ti a. M.P inthlan lo awm turah hian BJP thlawp theitu tur nilo, kan hnam, kan sakhua leh kan ram tana BJP do ngam Congress Party kan Vote a ngai a ni tiin, Lunglei mipui zawng zawngte pawh Congress Party ah Vote tura sawmin, tuntum inthlan lo awm turah hian kan sakhua leh kan hnam tan insuihkhawm zai i rel ang u a ti.
Vawiina LDCC Street Campaign-ah hian Pu Lal Thanzara MPCC President pawhin thu sawi bawkin, kan hmaa M.P inthlan lo awm tur chu Hindu lalram din tum BJP leh a thurualpui te leh an mahni dolettu Kristian Sakhaw humhim duhtu Congress leh a thawhpuite indona tur a ni tiin, hetihlaia MNF Candidate in BJP lama thut a tum tlat leh ZPM Candidate-in tling ta se a thutna lam tur a hrelo hi a vanduaithlak takzet a ni, a ti.
