Tunhnaia naupang khawih chhetu leh midang hetianga inhnamhnawihten hremna hmu ngei se an duh
24 June 2025: Mizoram State Commission for Protection of Child Rights (MSCPCR) chuan naupang chunga pawngsual leh hursualna a thleng leh thin chu an ngaihmawh thu leh pawi an tih thu an sawi.
MSCPCR hruaitute leh thuthar thehdarhtute vawiina MSCPCR pisa Aizawla an inkawmnaah, MSCPCR Chairperson, Pu Jimmy Laltlanmawia chuan tun hnaia naupang kumtlinglo khawihchhiaa, midang hmuh theih tura hursualna video bawlhhlawh siam nana naupang inhnamhnawih tirtu leh pholangtu Lalrampana chu CBI-te’n June ni 9, 2025 khan an man thu a sawi a, hei hi dan kalh niin, dan bawhchhetute chu kum 5 aia tlem lo Lung-In tan tir leh Rs Nuai 10 chawitir thlenga hrem theih a nih thu a sawi. Lalrampana leh midang hetianga inhnamhawihte chu an phû tawk hremna hmu ngei se an duh thu a sawi a, hei bakah hian MSCPCR hruaitute chuan Information Technology (IT) Act, 2000 Section 67 B chuan – naupang chunga hursualna leh a kaihhnawih lanna siam mai bakah a thehdarh chu hrem theih a ni tih an sawi bawk.
Doordarshan palai zawhna chhangin, MSCPCR hruaitute chuan School Education te nena thawk hovin POCSO chungchangah school tinte chu inzirtirna pe turin a hriattir tawh tih an sawi a, kumin May thla thlengin Mizoram chhungah kum tlinglote lakah hursualna avanga thubuai ngaihtuah hmabak 194 a awm mek thu an sawi bawk. (DD)
