21 June 2024: Union Home Minister Amit Shah chuan Assam Rifles sawn chhuah chungchangah thutlukna siamfel a ni tawh tih leh, an insawn ngei dawn thu Chief Minister Pu Lalduhoma a hrilh.
Pu Lalduhoma hian Amit Shah hi a chenna inah hmuin Cyclone Remal-in Mizorama chhiatna hrang hrang a thlen chungchangah Memorundum a thehlut a, Union Home Minister chuan a hmuna endik tur Central Team a rawn tir chho dawn tih leh; report an thehluh veleh chhawmdawlna an ngaihtuah tur thu a lo hrilh a, raltlan chungchangah sorkar laipuiin chhawmdawlna pek an tiam tih a lo hrilh bawk.
Amit Shah hian Mizoram sorkar hnuaia thawk tura Mizo Central Service Officer a dilte pawh tihhlawhtlinsak ngei a tum thu a lo hrilh a, Chief Minister-in August thla chhunga Mizoram tlawh tura a sawmna pawh tihhlawhtlin ngei a tum tur thu a hrilh a ni.
Chief Minister Pu Lalduhoma hi sorkar laipui thara mi pawimawh hrang hrang leh All Finance Ministers’ Meeting tel turin Delhi a thleng a, a thlen thlak hnu lawkah Union Home Minister hi hmu nghalin; Lok Sabha MP Pu Richard Vanlalhmangaiha’n a tawiawm a ni.
Chief Minister Pu Lalduhoma hian vawiin khan BJP President JP Nadda pawh a hmu bawk a ni. (DD)
