18 Oct 2025: Vawiin khan Lungleia Art & Culture Auditorium-a Pang Zirlai Pawl (PZP) Sub-Headquarters Lungleiin zirlai tharte lawmna leh zirlai ti ṭhate chawimawina, “Freshers’ Social cum Felicitation 2025” an buatsaih chu Lunglei South bialtu MLA Pu Lalramliana Papuia chuan khuallian niin a hmanpui.
Khuallian Pu Lalramliana Papuia chuan zirlai hlawhtlinna changte a lawmpui thu sawiin, zirlai tharte pawh zirlai an nihna leh an zir chhanah chiang a, hlawhtling tura tumruhna nen theih tawp chhuah turin a chah a. Vanneihna van tla rah hmuh aia thawhrimna rah hlut zawk tur leh hlawhtling tlaka thawk rim turin zirlaite chu a fuih.
Pu Lalramliana Papuia chuan Zo hnahthlak hnam peng hrang hrangte chu mahni hnam bila inla hrang lo va, Mizoram leh hnam tihmingṭha tura inelna ṭha bei tura chahin, zirna, infiamna leh hnathawhna kawng tinrengah Mizo nihna mawi taka a par vul theih nan mahni zawn ṭheuhva inelna thianghlim bei turin a chah bawk.
Hofpar Group of Business Director Pu K.Lalrintluanga uapna hnuaia hun hman hi PZP Sub-Hqrs Lunglei Vice President Immanuel Lalropeka’n a kaihruai a. BCM pastor Rev. K.Laldosanga’n hunserh hmangin, PZP SHQ Lunglei Secretary Zothankhuma’n report a pe a. Assistant Secretary Laltlanthanga kaihhruaiin Pang zirlai ti ṭha mi 13 te hnenah lawmpuina thuziak hlan a ni bawk.
Uaptu, Hofpar Group of Business Director Pu K.Lalrintluanga, PZP SHQ President Lallawmzuala leh Assistant General Secretary Zionrammawia te pawhin thu an sawi a. Treasurer Bethsy Lalzawmpuii’n lawm thu sawiin hun a khar.
Tun dinhmunah Pang Zirlai Pawl Sub-Headquarters Lungleiah hian member 250 an awm mek a ni.
