01 Oct 2025: “Give Blood, Give Hope, Together We Save Lives.” tih thupuia hmangin vawiin chawhma dar 10:30 khan Gov’t Higher Secondary School Lungleiah Voluntary Blood Donation Day pualin hun hman a ni.
Hemi puala inkhawm hi Dr.K.Lalhmachhuana, Treasurer AVBD Lungleiin a kaihruaia, Dr.Vanlallawma Khiangte, Blood Bank Officer Civil Hospital Lunglei chuan thu sawiin, Mihringte hi Pathianin thisen kan taksa mamawh bak mipaah litre 1 leh hmeichhiaah litre chanve aia tam deuh min pe vek a, thisen vawikhat kan pek hian ml 350 chauh kan draw thin a, kan vawikhat thisen pek hi mi pathumin an hmang tangkai thei a ni, a ti. Dr Vanlallawma chuan tunlaiah Stroke leh Heart attack a tam hle a, hetiang laka fihlim tur hian thisen pek hi a tha hle a ti a, hriselna atan leh vun nalh duhte tan thisen pek thin chu a tha em em a ni, a ti bawk.
Vawiina GHSS Lungleia Voluntary Blood Donation Day hmanna inkhawmah hian hmeichhia vawi 10 thisen pe tawh mi 16-te hnenah chawimawina Citation hlan an ni a, Zirlai naupang, NCC, GHSS leh midang mipa 32 leh hmeichhia 12, an vaiin thisen unit 44 an pe a, Civil Hospital Blood Bank-a thawkten an thisen hi an lak sak a ni.
