16 Nov 2023: Election Commission of India (ECI)-in December ni 3 (Pathianni)-a Mizoram Inthlanpui-a vote tla chhiar hun chu a sawn dawn lo niin Mizoram Chief Electoral Officer (CEO) Pu Mahdup Vyas-a’n a sawi.
CEO Pu Madhup Vyas-a hian Thawhlehni khan Delhi-ah chhukin ECI a zu dawr a. Nimin khan Aizawl a lo thleng leh tawhin, vote chhiar nî hi sawn a nih dawn loh thu a sawi a. “ECI-in inthlana vote tla chhiar hun a lo ruat tawh anga kalpui a ni dawn,” tiin Pu Madhup Vyas chuan a sawi a ni.
Hetih lai hian NGO Coordination Committee (NGOCC) chuan vote chhiar nî sawn a nih theih nan theihtawp an chhuah tur thu an sawi a, bawhzui zel dan tur an rel dawn tih an sawi a. A tul chuan ECI dawr tura Delhi-a lamkal intirh chungchang pawh an sawi tawh a; thutlukna erawh chu an la siam lo. Vawi thum lai ECI hnena vote chhiar nî sawn tura ngenna siam tawh MKHC hotute chuan ngenna an siam baka thil kalpui a ngai a nih chuan NGOCC kutah an dah tih an sawi a ni.
Tarlan tawh thin angin Mizoram-a political party-te, NGOCC leh MKHC te chuan inthlana vote tla chhiar nî atana ECI-in a ruat Decni 3 chu Pathianni a nih avangin a tuk Dec ni 4 emaw Dec ni 5 emawa sawn turin vawi tam tak an lo ngen tawh a. Tun thlenga ECI lam an la ngawih tlat avangin a tul anga bawhzui zel an tum thu NGOCC chuan an sawi a ni. (AIR Aizawl)
