YMA Day pualin hun hmang

15 June 2026: Vawiin hi Young Mizo Association (YMA) Day vawi 92-na anih angin Lunglei khawpui chhunga YMA Branch hrang hrangte pawhin YMA Day pual hian hun an hmang.

Lunglei khawpui chhunga YMA Branch tam zawkah chuan zingkarah Branch chhunga YMA Section hrang hrangten mahni Section huam chhung theuhah faina hnatlang thawkin, vawiin chhun lamah Branch pum huapin lawmna hun an hmanah Section inelna kawng hrang hranga an neih bakah Kum Puan hawnna hun an hmang bawk.

Lunglei khawpui chhunga YMA Branch thenkhat chuan vawiin YMA Day pual hian thlanmual samfai bakah tleirawlte thlan laih zirtir pahin thlan an lai lawk. Branch pakhat erawh chuan an vengah chhiat tawk pahnih an neih avangin YMA Day pual hian hun an hmang thei lo.

YMA Sub Hqrs Lunglei hruaitute chuan YMA Day hi khawpui chhung leh pawn lamah Branch thenkhatah te an hmanpui. President Pu K.Lalfakzuala chuan YMA Day puala YMA Sub Hqrs hnuaia member zawng zawngte chibai bukin, YMA chu Mizo hnam leh ram tan pawl ropui leh tangkai a ni tih hre thar leh theuh turin a ngen a ni.

YMA Sub Hqrs Lunglei hnuaiah hian tun dinhmunah Group 11 leh Branch 119 awmin heng zinga Branch 21 chu khawpui chhung Branch an ni a, member 50,430 an awm mek.