YMA-in voter pun tam zualna bialah Hearing neih a enpui mek

29 July 2026: Election Commission of India ruahman anga SIR 2026 atana Hearing neih mekah YMA Sub-Headquarters Lunglei chuan an huam chhunga voter pun tam zualna bialah te a theih ang angin Hearing neih a enpui mek zel.

Dt.28.07.2026 (Thawhlehni) khan Malsury Polling Sation-a Hearing kalpui chu a hmunah Pu C.Lalrindika, Secretary YMA Sub-Hqrs Lunglei, Pu LH.Lalmama, SEC member leh YMA Khawthlangtuipui Group aiawhin YMA Tlabung Branch OB leh Committee bakah MZP Tlabung aiawhten an enpui.

Pu C.Lalrindika chuan YMA chuan electoral roll felfai leh rintlak neih hi a duh dan anih angin India khua leh tui dik takte electoral roll-ah an chuan theihna tur leh paih turte paih an nih a, telh tur dik takte chauh telh an nih theih nana Mizoram pumpuiah hma la an nih thu a sawi a. YMA-te awm lohna a bik takin Thorang A/C leh West Tuipui A/C ah te an mahni hnaihtu YMA Khawthlangtuipui Group, YMA Lungsen Group leh YMA Thorang Group te leh an hnuaia Branch te tlawmngaiin an theih chin chinah Hearing-na a awm tur hian ruahmanna an siam thu leh Lunglei District hmun dangah pawh Branch hrang hrang leh Group-te’n ruahmanna an siam thu a sawi.

Pu C.Lalrindika chuan DEO, EO leh ERO leh AREO, BLO leh Political Party ten E/Roll dik leh rintlak nei tura hma an lakna chu a lungawithlak riha an hriat thu leh YMA chuan E/Roll dik leh rintlak kan neih theih nan a theih angin a enzui zel dawn thu a sawi a. District Election Officer leh a thawhpuite nen Lunglei District bikah ramri hnaih lama voter pun nasat theihna lai leh khawpui chhunga hearing a inlan tura an koh tamna P/S ah te khua leh tui nihna dik tak neite an luh theih nana hma an lak mekna chu lawmawm an tih thu a sawi bawk.

Tun hi ‘Ram leh Hnam’ humhalhna hnatlang nei mekah an inngai tih sawiin, Central YMA-in ngenna a siam angin huaisen taka YMA aiawhte chu hearing-naah thudik a ding ngam turin an inngen thar tih Pu C.Lalrindika, Secretary YMA Sub-Hqrs Lunglei chuan a sawi a ni.

YMA Khawthlangtuipui Group hnuaia Branch-te chu Ram leh Hnam Humhalh nana kulh vengtu an nih angin, hnam issue-ah chuan theih tawp chhuah zawm tur leh an hmalak tawhna avanga Mizoramin kan him phahna tam tak a awm tawh thu sawiin, hruaitute leh member inpe tak takte avangin kan mawipui em em che u a ni Pu C.Lalrindika chuan a ti bawk.