YMA Sub Hqrs Siaha hawnna hun hmang thei ta

05 Sept 2025: Central YMA-in vawiina Siaha Sub Hqrs YMA chawhnu dar 1:00 a hawn a tum chu Mara Thyutliau Py (MTP) ten an dodal hnuah vawiin tlai dar 5:00 khan YMA Sub Hqrs Siaha hawnna hun hi hman a ni.

Ruahman lawk angin YMA Sub Hqrs Siaha vawiin chawhnu dar 1:00 a hawnna hun hmang tur hian Central YMA hruaitu engemawzat leh YMA Sub Hqrs Lunglei hruaitute thahnem tak chuan Siaha hi an pan a, YMA Sub Hqrs Siaha hawnna hun hman an tum chu MTP te hian an dodal avangin ruahman lawk angin hun an hmang theilo. MTP Hqrs hruaitute leh CYMA hruaitute hun engemaw chen an indawr hnuah Central MTP hruaitute leh MTP Town Branch hruaituten Meeting neih leh in hemi hnu hian MTP lam hian YMA Sub Hqrs Siaha din chu rem an ti ta a ni.

Hetianga harsatna a awm avang hian vawiin chawhnu dar 1:00 a YMA Sub Hqrs Siaha hawnna hun hman tum chu vawiin tlai dar 5:00 khan hun hman tan niin CYMA Vice President Prof.Lalnuntluanga’n a kaihruaia YMA Sub Hqrs Siaha hawnna hun hi CYMA President Pu Lalhmachhuana’n a hmang a ni.