Zirbingna-in a hmuhchhuah danin Bal chhum eiin nu hnute tui a ti tam theia ngaih a ni

10 Sept 2025: Vawiin khan Health and Family Welfare Minister Pi Lalrinpuii chuan a office chamber-ah Bal chungchang zirbingna “Research on Phytochemical constituents & galactagogue properties of Colocasia esculenta (taro) and determination of its nutritive value” report bu a tlangzarh.

Health Minister Pi Lalrinpuii chuan bal chu Mizo culture a bet tlat a nih thu leh a thatna chi hrang hrang tlang hriat mai ni lova, research hmang ngeia hmuh chhuah a ni chu a hlut hle tih a sawi a, packaging leh marketing kawngah pawh a ‘nutritional value’ nena tarlan thlap a ni thei tur chu lawmawm a tih thu a sawi.

Mizoten thalai zinga kan ei lar tak Bal hi chaw tha a nih mai bakah nu hnute tui a ti tam thei tih sawi a awm avangin Mission Foundation Movement chuan zirchian tul an ti a. Ministry of Tribal Affair hnuaia Support to Tribal Research Institute scheme hnuaiah kum 2022-23 chhung khan Social Welfare & Tribal Affairs kaltlanga research hna hi thawh a ni.

He zirbingna in a hmuhchhuah tlangpui te chu: Balah hian compound thenkhat alkaloids, flavonoids te leh glycosides a awm tih hmuh a ni a. Heng compound te hi mihring tana chakna a thlen theih piah lamah nu hnute tui a ti tam theia ngaih a ni. He compound te hi then darh a, zirchiannaah chuan natural compound Luteolin 6, 8-C-diglucoside a awm tih hriat a ni a. Computer-based studies neihnaah he compound hi mihring taksaa receptor-ah a bei thei a ni tih zir chhuah a ni a, chu chuan hnute tui a ti tam thei tura rin a ni.

Bal chhum hi regular taka ei atan a him bakah a chaw tha a awm tih hmuh chhuah a ni a. Bal chhum hi Aizawl Zemabawk veng chhunga nu hnute tui pe lai mi sawmthum hnenah 100 gram in nitin thla hnih chhung pek a ni. Hemi chhung hian kar tin survey neih ṭhin a ni a, chu tah chuan 57 % in an hnute tui a tipung tih hmuh chhuah a ni a, hnute tui nei ngai lo pathum zingah pakhatin a neih phah a ni. (DIPR)